2019 senesi avgust ayında, Cenübiy okrugınıñ arbiy mahkemesi daa Şimaliy-Kavkaz mahkemesi olıp, aqyarlı Enver Seytosmanovnıñ davasını baqqanda, qabaatlayıcı taraf şaatnı ketirdi. Mahkeme salonında o, FSB basqısı altında malümat bergenini ve ondan vazgeçkenini ayttı. Şaat Tahqiqat komitetine şikâyet etkenini bildirdi. Qırımdaki Arbiy-tahqiqat komiteti tahqiqattan evelki teşkerüv keçirip, Rusiye mahsus hızmetleri hadimleriniñ areketlerinde bir bozuv tapmadı. Bu insan Baydar (Orlinoye) qasabasınıñ sakini Ruslan Bekirov ola, şimdi onı FSB yañlış malümat bergeninde qabaatlay.
Bir yıl evelsi, 2019 senesi martnıñ 29-nda, saba saat onlarda Ruslan Bekirovğa telefon ettiler. Tanış olmağan ses köç hızmetiniñ hadimi olğanını aytıp, Bekirovnıñ politsiya bölügine kelmesini talap etti – Ruslan Bekirovda çalışqan insanlarnıñ vesiqaları yoq (er adamı samsa pişirip sata – QA) dedi. O, vaziyetni böyle izaatladı: «tahminen on beş daqqadan soñ Baydar qasabasınıñ İç işler nazirligi bölügine keldim. Kiriş qapusı qapalı edi. Arqadan Tanış olmağan bir insan yaqınlaştı, boyu bir yetmiş – bir seksen metr, orta piçimli, başında boz kepka, saçları sarı, qoyu mavı renkte cins kurtkası, cins, ayaqlarında krossovka, el tarağında iyeroglif şeklinde tatu bar edi. Selâmlaşıp, sağ tarafqa kösterdi. Yanıma betleri qapalı eki silâlı şahıs keldi, «FSB» işaretleri bar edi, qollarımnı tuttılar, ağırttılar ve turğan maşinağa mindirdiler».
İşğal etilgen Qırım ve Aqyar FSBsi binası
Bekirovnı Aqyardaki FSB bölügine alıp keldiler. Onıñ aytqanına köre, hadim Yuriy Andreyev onı sorğuğa çekti. Soñra Bekirovnı soqaqta tutqan Filipp (soyadı belli degil – QA) qoşuldı. Andreyev esasen Enver Seytosmanov (Aqyardaki «Hizb ut-Tahrir davasınıñ» mabüsi – QA) aqqında soradı. FSB hadimleri ses qaydını açtı, anda Enver Seytosmanov Ruslan Bekirovğa ve Adnan adlı adamğa «Hizb ut-Tahrir» bölüginiñ azası olğanını ayta eken.
«Andreyev bir vesiqanı bastırıp, imzalamağa talap etti. Bu vesiqada Enver Seytosmanovnıñ «Hizb ut-Tahrir» azası olğanını aytqanıma dair malümat bar edi. Men vesiqanı imzalamağa istemedim. Bundan soñ Andreyev ve özüni Filipp olaraq tanıtqan FSB hadimi meni qorquzıp başladılar, imzalamasam, on yılğa apiske atarlar, dep aytqanlar. Ana-babamnı bir daa körmeycem degenler. Yuqunçı olğan, hususan verem hastası olğan mabüslernen qapatacaqlar, evden ve ana-babamdan uzaq bir yerge ceza çekmege yollaycaqlar, dep aytqanlar. Apishanede çürüp ölecem, eki yüz biñ ruble para cezasını berecekler, dep aytqanlar. Enver Seytosmanovğa iftira atqan vesiqanı imzalamaq talapları bar edi», – dep ayta o.
Ruslan Bekirov
Bekirov eki saat devam etken sorğunıñ soñunda yaramadı. Qırımtatarınıñ advokatı Emil Kurbedinovnıñ aytqanına köre, neticede Ruslan Bekirov Seytosmanovğa qarşı malümatnı imzaladı. Bundan soñ advokatlarnıñ ofisine kelip, bunı tarif etti.
Tahqiqat komitetinden cinaiy dava açılmasınen bağlı red cevabı keldi – Bekirovnıñ mahkemede bergen malümatından soñEmil Kurbedinov
«Biz bu FSB hadimleriniñ cinayetine dair arizanı tahqiqat komitetine bermege tevsiye etip, olar belli malümat almaq içün maneviy basqı yaptı, dep añlattıq. Tahqiqat komitetinden cinaiy dava açılmasınen bağlı red cevabı keldi – Bekirovnıñ mahkemede bergen malümatından soñ. Söz sırası, cinaiy dava açılmaycağını başta ne içündir mahkeme bildirdi, daa soñra resmiy vesiqa keldi», – dep ayta advokat.
Daa soñra, 2019 senesi avgust ayında, Enver Seytosmanovnıñ davası temelden baqılğanda, qabaatlayıcı tarafnıñ şaatı olaraq tanıtılğan Bekirov mahkemede bergen malümatından vazgeçip, FSB tarafından yapılğan maneviy basqı altında şaatlıq etkenini bildirdi. O, Seytosmanovnıñ «Hizb ut-Tahrir» teşkilâtınıñ azası olğanı aqqında aytqanını eşitkenini red etti.
Advokat Emil Kurbedinov ve Ruslan Bekirov
Enver Seytosmanov 17 yıl sert rejimli koloniyada qalmasına üküm etilgen soñ ve üküm işke tüşürilgen soñ, Ruslan Bekirovğa kene belli olmağan nomer telefon etti. Bu sefer adam özüni Bekirovnıñ satışqa çıqarğan maşina alıcısı olaraq tanıttı.
«Telefon etip aytalap: men alacam, anda kel. Anda dostunen beraber kele, onı kene tutalar, evine alıp keteler, tintüv keçireler. Evde bir şey tapmaylar, şunıñ içün kene FSB bölügine ketireler ve anda sahte şaatlıq etkeninde qabaatlaylar», – dep tarif ete advokat Emil Kurbedinov.
Şimdi otuz yaşında Bekirovğa qarşı Rusiye Ceza kodeksiniñ 307-nci maddesiniñ 1-inci qısmına istinaden cinaiy dava açıldı. Tezden fonografik ekspertiza yapılacaq, o, ses qaydında olğan sesniñ oña ait olğanını ya tasdıqlar, ya red eter. FSB tahqiqatçısı Filipp Rıbalka (bu tahqiqatçı Aqyarda «İyegova şaatları» yerli cemiyetini qurğanından şübheli sayılğan Viktor Staşevskiyniñ davasınen oğraşqan edi – QA) Bekirovnıñ bir yerge çıqmasını yasaqlap, sıñırlav tedbirini belgiledi.
Advokat Kurbedinovnıñ aytqanına köre, «sahte şaatlıq» maddesi Rusiyedeki mahkeme davalarında çoq qullanılmay.
«Bu madde olğan esnaslarda insanlar qabaatını tanıy ve olarğa para cezası berile. Eminim, müvekkilim Tahqiqat komitetine FSB hadimlerini şikâyet etkeni içün taqip etile. Bazı vaqıtları kerek olğan malümat nasıl alınğanını kösterdi. Ve, elbette, oña qarşı başlatılğan cinaiy tahqiqat belli bir cesaret içün intiqam ola. İnsan susmadı ve qorqmadı», – dep ayta advokat.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.