Çerniğivde Rusiye ücümi neticesinde yaralanğan 20-den ziyade kişi aqqında belli oldı, dep haber ete Devlet fevqulâde vaziyetler hızmeti oktâbrniñ 29-nda.
"Rusiyeniñ şeer merkezine yapqan darbesi neticesinde yaralanğanlarnıñ sayısı 23 oldı, 4-ü – bala, eñ kiçigi 10 aylıq", – dep haber ete müessise.
Qurtarıcılar ücüm neticesinde çıqqan yanğınlarnı söndürdi. Devlet fevqulâde vaziyetler hızmeti dördü bala olğan 17 insanğa psihologik yardım köstergenini bildire.
Çerniğiv merkezine qarşı rus darbesiniñ aqibetleri. 2026 senesi oktâbrniñ 29-ı
Ukrayina İç işler naziri İvan Vığovskiy Çerniğivge qarşı darbeni izaatlap, darbe adiy şeer soqağına yapıldı, dep qayd etti.
"Ev, tükân, maşinalar zarar kördi – arbiy bir manaları yoq".
Çerniğiv merkezine qarşı rus darbesiniñ aqibetleri. 2026 senesi oktâbrniñ 29-ı
Daa evel Çerniğivge qarşı darbe neticesinde eki 15 yaşında qız elâk oldı.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.