Qırımtatar halqı lideri Mustafa Cemilev, Rusiye 2019 senesi daa 15 yılğa Qırımğa kirüv yasağını uzatqanını bilmegen. Bunı o, Qırım.Aqiqatqa bildirdi.
«Uzatqanlarını bilmedim. 2014 senesi olar 5 yılğa, yani 2019 senesinece kirüvni yasaq etken ediler. Soñra, 2018 senesi, bu müddetniñ soñunace bir yıl qalğanda meni sanktsiyalar cedveline kirsetken ediler. Anda müddet aqqında iç bir şey yazılmağan edi. Menim davamnıñ materiallarında 2019 senesi martnıñ 5-nde kirüv yasağı daa 15 yılğa uzatılğanı belli oldı», – dedi Cemilev.
Cemilev qayd etti ki, yaşını köz ögüne alıp, Rusiye yasağınıñ emiyeti yoq.
«2034 senesine yaqın ne men, ne işğal artıq olmaycaq. Ölsem, Qırımda cenazemni keçirmempk içün bunı yapalar. Sovet devrinde böyle bir şey yapıla edi», – dep qayd etti o.
Qırımğa kirüv yasağı sebebinden Mustafa Cemilev advokatı Nikolay Polozov ile beraber İnsan aqları Avropa mahkemesine muracaat etecek ola.
Qırımtatar halqınıñ milliy lideri Mustafa Cemilevge Rusiyege ve şimdilik onıñ nezaretinde olğan Qırımğa kirüv yasağını 2034 senesinece uzattılar.
Your browser doesn’t support HTML5
Джемилев: «Какая-либо торговля с Крымом – нарушение санкций»
Qırımdaki Rusiye Tahqiqat komitetiniñ idaresi aprelniñ 13-nde Mustafa Cemilevniñ qabaatlavını Rusiye Ceza kodeksiniñ üç maddesine istinaden aydınlattı: «Rusiyege kirişi yasaqlanğan çetel vatandaşınıñ bir gruppa insanlarnen evelden añlaşıp, Rusiye devlet sıñırını keçüv (Rusiye CK 322-nci maddesiniñ 3-ünci qısmı); nariye silâsını diqqatsız saqlav, onıñ başqa insan tarafından qullanılması ve ağır aqibetlerge yol açması (Rusiye CK 224-ünci maddesi); silânı qanunsız alıp saqlav (Rusiye CK 222-nci maddesiniñ 1-inci qısmı)».
Advokat Nikolay Polozovnıñ aytqanına köre, Cemilevge qarşı oğlu Hayserniñ Ukraina davası qullanıla.
Mustafa Cemilev, işğal etilgen Qırımda oña qarşı açılğan cinaiy davalarda «Rusiye tarafınıñ qabaatlavları saçma olğanını» Avropa insan aqları mahkemesinde isbatlamağa niyetlene, dep bildirdi.
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.