Qırımtatar halqınıñ milliy lideri Mustafa Cemilevniñ bildirgenine köre, o ve imayesi işğal etilgen Qırımda oña qarşı açılğan yañı dava ile alâqası olğan bütün şahıslarnen bağlı malümatnı Avropa insan aqları mahkemesine bermege niyetleneler.
Bu aqta o, bu davanıñ Rusiye kontrolindeki Qırım mahkemesine berilüvini izaatlap, Qırım.Aqiqatqa ayttı.
Cemilevniñ daa bir kere qayd etkenine köre, bu davanıñ mahkeme qararı onı meraqlandırmay.
«Men Polozovdan (advokat Nikolay Polozov – QA) bütün davalarnıñ kopiyalarını almasını rica ettim, eñ çoq meni bu davada yer alğan insanlarnıñ soyadları meraqlandıra, çünki bu halqara uquq normalarınıñ sert bozuluvı ola ve biz bu şahıslarğa qarşı sanktsiyalar kirsetilsin dep, halqara qurulışlarğa muracaat etecekmiz. İlk evelâ – Avropa insan aqları mahkemesine. Soñra bütün malümat Gaagağa ketecek. Anda bayağı malümat bardır endi, hususan Putinnen (Rusiye prezidenti Vladimir Putin – QA) bağlı. Er şeyniñ bir vaqtı bar», – dedi o.
Cemilevniñ fikirince, işğal etilgen Qırımda Rusiye FSBsi tarafından oña qarşı açılğan dava qırımtatarlarnı yarımadadan çıqarmaq içün qullanıla.
İyünniñ 8-nde berilgen malümatqa köre, Rusiye Tahqiqat komiteti Cemilevniñ davasını mahkemege berdi. Bundan soñ Cemilevniñ advokatı Nikolay Polozov ne oña, ne de müvekkiline haber etilmedi, dep bildirdi.
Qırımda mayısnıñ 27-nde Rusiye Tahqiqat komiteti qırımtatar halqınıñ lideri Mustafa Cemilevge qarşı «cinaiy dava» tahqiqatını yekünledi.
Qırımdaki Rusiye Tahqiqat komitetiniñ idaresi aprelniñ 13-nde qırımtatar halqınıñ lideri Mustafa Cemilevni Rusiye Ceza kodeksiniñ üç maddesine köre qabaatladı. Advokat Nikolay Polozovnıñ aytqanına köre, şimdi Cemilevge qarşı oğlu Hayserniñ ukrain davası qullanıla.
Ukraina prezidentiniñ Qırım Muhtar Cumhuriyetindeki temsilciligi Rusiye tahqiqatçılarınıñ qırımtatarlarnıñ milliy lideri Mustafa Cemilevge qarşı cinaiy davasını siyasiy taqip dep saya.