Nariman Celâlnen beraber Kremlniñ diger esirleri – ağa-qardaş Asan ve Aziz Ahtemovlar, Leniye Umerova ve qırımlı aq qorçalayıcı Server Mustafayevniñ Rusiye esirliginden azat etilmesi mümkün edi. Bu aqta qırımtatar milliy lideri Mustafa Cemilev Qırım.Aqiqat Radiosınıñ yayınında ayttı.
Lâkin neticede tek Celâl azat etildi, 2019 senesinden berli o, Rusiye Ukrayınağa deñişüv çerçivesinde qaytarılğan ilk qırımlı siyasiy mabüs oldı.
Mustafa Cemilev Rusiye tarafından yapılğan manialarğa baqmadan, Ukrayına akimiyeti vatandaşlarınıñ Rusiye esirliginden qaytarıluvı üzerinde çalışmağa devam ete, dep qoştı.
«Ruslar qırımtatarlarnıñ soyadlarını sile edi, bir razılıq aqqında aytılsa, çoq şey istey ediler… bir qırımtatarı içün aman-aman elli rus esiri», – dep ayttı Cemilev Qırım.Aqiqatqa.
Qırımtatar halqınıñ lideri aytqanına köre, Celâlnıñ azat etilüvi meselesinde Rusiye akimiyeti «iç laf etmege istemey edi, ep red ete ediler».
Nariman Celâlnıñ Rusiye esirliginden qaytuv levhaları
İyünniñ 28-nde on Ukrayına vatandaşı Rusiye esirliginden azat etildi, aralarında Qırımtatar Milliy Meclisiniñ reis muavini Nariman Celâl bar. Bugünki künde ukrayınalı siyasiy mabüslerniñ sayısı 217 insan ola, 60%-ı qırımtatarı, dep bildirdi Ukrayına prezidentiniñ Qırım Muhtar Cumhuriyetindeki daimiy vekili Tamila Taşeva.
2022 senesi sentâbrniñ 21-nde Rusiyeniñ kontroli altında bulunğan Qırım Yuqarı mahkemesi Nariman Celâlnı «Anğarada gaz borusında diversiya davası» boyunca sert rejimli koloniyada 17 yılğa azatlıqtan marum etip, 700 biñ ruble para cezasını ve 1,5 yıl azatlıqtan marum etüv cezasını berdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.