Qırımtatar Milliy Meclisi reisiniñ birinci muavini Nariman Celâl Kremlniñ ukrayinalı mabüslerini azat etüv esnasında iştirak etmege azır olğanını bildirdi. Bunı o, Rusiye apishanesinden azat etilgen soñ Ukrayinağa kelgeninen bildirdi.
"Olarnı eñ yaqın vaqıtta evge qaytarmaq içün men şahsen qoşulmağa azırman", — dep ayttı Celâl.
Onıñ aytqanına köre, Rusiye esirliginde ve apishanelerinde "azatlıqnı beklegen pek çoq aqiqiy, vatanperver oğlan ve qızlar" qala.
Celâl, qarşılağanlarğa teşekkür bildirip, "tuvğan toprağında bulunğanına" pek quvanğanını bildirdi.
2022 senesi sentâbrniñ 21-nde Rusiyeniñ kontroli altında bulunğan Qırım Yuqarı mahkemesi Nariman Celâlnı "Anğarada gaz borusında diversiya davası" boyunca sert rejimli koloniyada 17 yılğa azatlıqtan marum etip, 700 biñ ruble para cezasını ve 1,5 yıl azatlıqtan marum etüv cezasını berdi.
Ondan ğayrı Asan Ahmetovnı 15 yıl sert rejimli koloniyada qalmasına üküm etip, 500 biñ ruble para cezasını ve 1 yıl azatlıq sıñırlavını belgilediler. Onıñ qardaşı Aziz Ahtemov 13 yıl sert rejimli koloniyada qalmasına üküm etildi, 500 biñ ruble para cezası ve 1 yıl azatlıqtan marum etildi.
Oktâbrniñ 2-nde Nariman Celâl ve ağa-qardaş Ahtemovlarnı Aqmescitteki 2-nci SİZO-dan alıp ketip, Rusiye apishanelerine etap ettiler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.