Haberge köre, Aqyarnıñ 45 yaşında sakini «Ukrayina Havfsızlıq Hızmeti ile bağ qurıp», arbiy bölüklerniñ yerleri, Qara deñiz flotunıñ gemileri ve suv astı gemileriniñ yeri, Aqyar körfezlerinde bon qoralar aqqında malümat bergen eken.
«2024 senesi fevral ayında Aqyar şeer mahkemesi mahkümni casuslıq şeklinde devlet hainligi maddesine istinaden qabaatlap, 200 biñ ruble para cezası ve eki yıl serbestligini sıñırlavnen beraber 15 yılğa sert rejimli koloniyada qalmasına üküm etti», – dep aytıla haberde.
Rusiye istinaf mahkemesiniñ qararınen üküm deñiştirilmedi, böylece, işke tüşürildi, dep bildire müessise.
2014 senesinden başlap Rusiyede ve işğal etilgen topraqlarda cenkke qarşı çıqqanlar kütleviy sürette taqip etile. 2023 senesi Rusiye Federatsiyasında eñ az 98 kişi satqınlıq, 31 casuslıq, 19-ı ise ecnebiylernen işbirligi cinaiy davalarınıñ iştirakçisi oldı. Mahkemelerge eñ az 88 dava ketirildi, olardan 50-si endi qabaatlavlarnen neticelendi, dep esapladı Sibir.Realii.
ZMINA İnsan aqları merkezi Tetâna Peçonçık tarif etkenine köre, Qırımda Rusiye akimiyeti tarafından devlet hainligi (Rusiye Federatsiyası Ceza kodeksiniñ 275-inci maddesi) ve çetel devletinen işbirligi (Rusiye Federatsiyası Ceza kodeksiniñ 275.1-inci maddesi) maddelerine istinaden qabaatlav sayısı arttı.
Onıñ aytqanına köre, Ukrayina aq qorçalayıcıları al-azırda 8 davanı taqip ete. Peçonçık bu maddelerge köre qabaatlav sayısı Rusiyeniñ Ukrayinağa qarşı büyük ücümi başlağan soñ arttı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.