Sergey Filatov, işğal etilgen Qırımdan 53 yaşında "İyegova Şaatları"nıñ azası, Rusiyeniñ Rostov-na-Donu şeerindeki 10-uncı tüzetüv koloniyasından azat etildi.
Bu aqta "İyegova Şaatları. Uquq vaziyeti" saytı bildire. Dört balanıñ babası 2020 senesi saban ayından başlap apiste edi.
"Eñ qıyını mabüslerniñ çoqusı sigara içkenleri edi. Bir kere kamerağa kirip, tütün sütünini kördim. Taze ava penceredeki kiçik teşikten ala edim", — dep aytıp bere Sergey Filatov.
2023 senesi, apis müddetiniñ üçte birinden çoqunı keçirgen soñ, Filatov azatlıqtan marum etüv cezasını tüzetüv işlerine deñiştirmek içün muracaat etti. Mahkeme, koloniya memuriyeti müsbet hasiyetname bergenine baqmadan, red etti.
Rusiye kontrolindeki Canköy rayon mahkemesi 2020 senesi saban ayınıñ 5-nde Filatovnı altı yıl umumiy rejimli koloniyada qalmasına üküm etti.
Rusiye Yuqarı mahkemesi "Rusiyedeki yegova Şaatlarınıñ idare merkezi"ni ekstremist teşkilât olaraq tanıdı ve 2017 senesi onıñ faaliyetini yasaq etti.