Rusiye kontrolindeki Qırım Yuqarı mahkemesi Canköy rayonınıñ sakinini Ukrayina telükesizlik hızmetinen işbirligi yapqanında qabaatlap, 16 yılğa azatlıqtan marum etti. Bu aqta martnıñ 24-nde Rusiye qurğan Qırım prokuraturası haber etti.
"Alınğan malümatqa köre, region sakini mahsus arbiy operatsiyanıñ keçirilüvine qarşı çıqıp, içtimaiy ağlardan birinde Ukrayina telükesizlik hızmetinen yazışqan. Silâ, tehnika ve mudafaa inşaatlarına dair malümat toplaması kerek olğan vazifesini reberinden alğan", – dep aytıla haberde.
Berilgen malümatqa köre, er adam Qırımnıñ İçki rayonında Rusiye arbiy tehnikasınıñ kolonna areketi aqqında malümat toplap, Ukrayina mahsus hızmetine bergen eken. Rusiye uquq qoruyıcılarınıñ malümat doğrulığını cenk şaraitlerinde teşkermek zor ola.
Mabüsniñ adı ve soyadı aytılmay, açıq izaatları yoq. Ukrayina telükesizlik hızmeti bu haberni izaatlamadı.
"Tribunal. Krımskiy epizod" aq qorçalayıcı leyhası menbalarınıñ malümatına esaslanıp bildirgenine köre, laf "Qalay (Azovskoye) köyüniñ sakini Serdar İzmaylov aqqında ketedir, FSB hadimleri onı taa 2024 senesi iyün ayında tutıp, bir yıldan ziyade (2025 senesi noyabr ayına qadar) uquqiy statussız bütünley izolâtsiyada tuttı".
Qırım.Aqiqat muarririyeti devam etken işğal ve cenk şaraitlerinde bu malümatnı mustaqil menbalarda tasdıqlap olamay.
Aq qorçalayıcılar devlet hainligi, Ukrayina ile işbirligi, casuslıq ve diversiya maddelerine istinaden davalarnıñ sayısı artacaq, dep tahmin ete. Şimdi FSB böyle davalarnı aman-aman er kün aça, 2014 senesine qadar ise olarnıñ sayısı yılda eñ çoq 10 edi.