Rusiye mahkemesi Canköy rayonınıñ 34 yaşında sakinini Keriç köpründeki patlav aqqında Telegramda yazğanları içün dört yılğa azatlıqtan marum etti. Bu aqta Rusiye kütleviy haber vastaları Qırım ve Aqyardaki Rusiye FSB idaresiniñ matbuat hızmeti malümatına esaslanıp yaza.
Rusiye uquq qoruyıcıları bildirgenine köre, erkek telegram kanallarından biriniñ idarecisi olıp, köpür patlatıluvını aqlağan malümatlar paylaşqan edi.
"Tilşınaslıq ekspertizası terrorizmni aqlağan ibareler taptı", – dep yaza "RİA Novosti Krım" FSB malümatına esaslanıp,
Qırımlı tam olaraq ne yazdı – aytılmay. Adı ve soyadı aydınlatılmay, açıq izaatları ise yoq. Rusiye uquq qoruyıcılarınıñ malümat doğrulığını cenk vaziyetinde teşkermek zor ola.
2022 senesi oktâbrniñ 8-nde Keriç köpründe patlav oldı. Rusiye uquq qoruyıcılarınıñ malümatına köre, köpürde yük maşinası patlatıldı, neticede yolnıñ eki közü yıqıldı ve demiryol qısmında büyük yanğın çıqtı. Dört kişi elâk oldı. Kreml yolbaşçısı Vladimir Putin Rusiye Tahqiqat komitetiniñ tahqiqatına esaslanıp, Keriç köpründe patlavnı "terakt" dep adlandırdı ve Ukrayina mahsus hızmetlerini qabaatladı. Daa bir patlav Keriç köpründe 2023 senesi iyulniñ 17-nde oldı. Rusiye akimiyeti ve uquq qoruyıcıları Ukrayina mahsus hızmetlerini qabaatladı.
Keriç köprü Rusiye içün işğal etilgen Qırımnı temin etmek, Ukrayinağa qarşı cenkni devam ettirmek maqsadınen anda asker, tehnika ve silâ taşımaq içün strategik ceetten pek müimdir.