Ukrayina Silâlı quvetleriniñ Baş ştabı Canköy civarında demiryol stantsiyasına qarşı darbeni tasdıqladı. Bu haber müessiseniñ içtimaiy ağlardaki saifelerinde derc etildi.
«Ukrayina Silâlı quvetleriniñ mahsus operatsiyalar küçleri Canköy demiryol stantsiyasınıñ yaqınlarında mahsus areketler yaptı. Operatsiya avgustnıñ 21-ne keçer gecesi oldı. Mahsus hadimler yaqar-yağlayıcı maddelernen rusiyelilerniñ trenine ücüm etti. Mahsus areketler neticesinde Rusiye ordusınıñ cenübiy gruppirovkasınıñ temin etilüvi zorlaştırıldı», – dep aytıla haberde.
Rusiye arbiyleri bu beyanatnı daa izaatlamadı. Avgustnıñ 21-nde saba Qırım Telegram kanallarında Canköyde uçucısıznıñ ücümi neticesinde çıqqan yanğın aqqında yazıldı. «Krımskiy veter» Telegram kanalı yazğanına köre, darbe demiryolğa endirildi. Rusiye akimiyeti bu adise aqqında bir şey haber etmedi.
2022 senesinden başlap yarımada aman-aman er kün uçucısız ve raketalarnıñ ücümine oğray, çoqusı allarda Rusiye Mudafaa nazirligi ya da Rusiye akimiyeti, bu malümat isbatlansa bile, arbiy obyektlerge darbelerni tasdıqlamay.