Büyük cenkniñ eñ tesirli fotoresimleri: Rusiyeniñ Ukrayınağa qarşı istilâsınıñ yılı
2022 senesi fevralniñ 24-nde Rusiye ordusı Ukrayınağa istilâ etti, Çuguyev şeerine qarşı açılğan ateş vaqtında 53 yaşında oca Yelena Kurilo zarar kördi.
«Böyle bir şey olacaq dep bir vaqıt tüşünmedim. Bu ayatta böyle bir şey olacaq, dep tüşünmedim», – dedi o.
Ukrayına askerleri 2022 senesi fevralniñ 25-nde Kyivde köpürde mevzi ala. Rusiye ordusı şeer ve arbiy obyektlerge qarşı avadan darbe endirip ve ordu ve tanklarnı üç yönelişten atıp, Ukrayına paytahtınıñ çetlerine çıqtı.
Kyiv civarındaki Buça şeeriniñ soqağınıñ yoq etilgen Rusiye zırhlı tehnikası, 2022 senesi martnıñ 1-i. Rusiye ordusı Ukrayına paytahtını sarıp alamadı ya da zapt etemedi, ve neticede olar regiondan çekildi.
Marina Yatsko ömür arqadaşı Fedornen hastahanege kire, quçağında Mariupolge açılğan ateş vaqtında yaralanğan bir buçuq yaşında oğlu Kirill bar, 2022 senesi martnıñ 4-ü. Kirill sağ qalamadı.
Er adamı balanı Rusiye ordusınıñ darbesinden soñ İrpin şeerinden çıqara, 2022 senesi martnıñ 6-sı.
Qadın Kyivdeki metro stantsiyasında mışığını quçaqlay, 2022 senesi martnıñ 8-i, bir çoq insan anda saqlanmağa mecbur edi.
Ekinci cian cenkini hatırlatqan sanalar martnıñ başında dünyanı şaşırttı, Ukrayına sakinleri telükesizlik maqsadınen saqlandı, Rusiye ise bir qaç şeerge raketalarnen ücüm etti.
Cesetlerni Mariupol çetindeki qardaş mezarına taşıylar, 2022 senesi martnıñ 9-ı.
Liman şeeriniñ aman-aman üç ay devam etken qamaçavı neticesinde on biñlernen sakin elâk oldı ve binalarınıñ 90 fayızı yoq etildi.
Rusiye tankı Mariupolde mesken evge ateş açqan soñ patlav oldı, 2022 senesi martnıñ 11-i.
Muasara etilgen Sumı şeerinden qurtarılğan 5 aylıq öksüz oğlançıq Kyiv şeeriniñ kardiologik merkezinde bebek arabasında yuqlay, 2022 senesi martnıñ 20-si.
Harkivde Rusiye ücüminden soñ çıqqan yanğınnıñ alevi ve tütün yanından ayaqmaşinanen keçken erkek, 2022 senesi martnıñ 25-i.
Ukrayına askeri An-225 «Mriya» naqliye uçağınıñ parçaları yanından keçe, 2022 senesi aprelniñ 2-si.
«Mriya», dünyanıñ eñ büyük uçağı, fevralniñ 27-nde Ğostomeldeki Antonov ava limanında Rusiye darbesi neticesinde yoq etildi. «Arzu» manasını taşığan «Mriya» bütün dünyada meşur edi.
6 yaşında Vlad Tanük Kyivniñ civarında eviniñ azbarında anası İra Tanükniñ mezarı yanında tura, 2022 senesi aprelniñ 4-ü. Anası Rusiye istilâsı ketirgen açlıq ve stressten can berdi
Yana Baçekni aqayı Yevgeniy Vlasenko ve anası Lübov Gubareva teselli eteler. O, Rusiyeniñ Harkivge açqan ateşi neticesinde elâk olğan 79 yaşında babası Viktor Gubarev içün ağlay, 2022 senesi aprelniñ 18-i.
Qurtarıcılar 2022 senesi aprelniñ 28-nde Kyivdeki Rusiye darbesiniñ yerinde işke azırlanalar. O ücümde yaqında yañı çoq qatlı evge yerleşken Azatlıq Radiosınıñ jurnalisti Vera Giriç elâk oldı. Ukrayına prezidenti Volodımır Zelenskıy BM baş kâtibi Antoniu Güterrişnen körüşken soñ olğan ücüm neticesinde eñ az 10 insan yaralandı.
Ukrayına ordusı Harkiv civarında keri alğan Vilhovka köyünde 11 rus askeriniñ cesedleri yata, 2022 senesi mayısnıñ 9-ı.
23 yaşında Oksana Balandinanı aqayı Viktor Lvivdeki hastahanede taşıy, 2022 senesi mayısnıñ 13-ü. Evi yanında Rusiye snarâdı patlağanda Oksana ayaqlarsız ve sol qolunda dört parmaqsız qaldı.
«Patlav oldı. Ayaqlarım birden bir boşluqqa tüşti. Baqtım ve ayaqlarım yoq — tek kemik ve qan», — dep hatırlay o.
Olena Rusiyeniñ Harkivge açqan ateşi vaqtında elâk olğan aqayı Oleksiyniñ cesedi yanında ağlay. 2022 senesi mayısnıñ 26-sı
Apay-aqay Rusiye ordusınıñ Donetsk vilâyetindeki Çasiv Yar şeerine kerçekleştirgen darbesi neticesinde mesken evniñ viraneleri altında qalğan tuvğanlarından haber beklep, qurtarıcılarnıñ işini közete, 2022 senesi iyülniñ 10-u.
Köpekli qızçıq qartana ve qartbabasına Donetsk vilâyetiniñ Pokrovsk şeerinden ketken tahliye treninden el sallay, 2022 senesi avgustnıñ 2-si.
Ukrayına ükümeti sakinlerni sıcaq, elektrik ve temiz suv olmaz dep, Donetsk vilâyetini terk etmesine çağırdı.
Tuman ve alev Rusiye işğal etken Qırımda Rusiye arbiy ava bazası üstünde köterilgende insanlar plâjda raatlana, 2022 senesi avgustnıñ 9-ı.
2022 senesi avgustnıñ 31-nde tuvğanları ve dostları 26 yaşında Anastasiya Öhrimenkoğa qoltuta, aqayı ukrayınalı asker Yuriy Stiglük Rusiye işğalcilernen cenkleşip elâk oldı.
Qarpız tutqan Ukrayına askeri 2022 senesi sentâbrniñ 3-nde Donetsk vilâyetinde cebege raketa uçqanda balaban parmaqnı köstere. Meyva Rusiye ordusı mart ayında işğal etken Herson şeerini azat etüv Ukrayına arbiyleriniñ qarşı ücüminiñ timsali oldı.
Qırımlılar oktâbrniñ 8-nde saba küçlü patlav olğan yanğan Keriç (Qırım) köprüne baqa. Keriç, Qırım, oktâbrniñ 8-i.
Urulğan Rusiye tankı Svâtogorskta qarda yata, 2023 senesi fevralniñ 12-si.
Qadın Kivşarovkada Paltonen köpekni qızdıra, 2022 senesi oktâbrniñ 16-sı. Yerliler gaz, elektrik ve suvsız yaşay ediler.
Fotoresimlerde Rusiyeniñ İranda yapılğan uçucısız kamikadze tüşmezden evel ve tüşken soñ levhalar, 2022 senesi oktâbrniñ 17-si.
22 yaşında ukrayınalı arbiy Vadim Berejnoynıñ cesedi Harkivdeki mezarlıqta kömülecek, 2022 senesi oktâbrniñ 17-si.
Esli-başlı çift 2022 senesi oktâbrniñ 27-nde Bahmutqa açılğan ateş kesilgende quçaqlaşa. Şarqiy Ukrayına bir qaç aydan berli Rusiye ordusınıñ ücümlerine oğray.
Ukrayına askerleri Donetsk vilâyetiniñ Bahmutı civarında Rusiye mevzilerine top ateşi yapa, 2022 senesi noyabrniñ 20-si.
Kyivde elektrik energiyası söndürilgende qadın fenernen kete, 2022 senesi dekabrniñ 14-ü.
ABD prezidentiniñ muavini Kamala Harris (soldan) ve Vekiller palatasınıñ o vaqıt spikeri olğan Nensi Pelosi Ukrayına prezidenti Volodımır Zelenskıynıñ Amerika vekillerine Bahmutta cenkleşken askerlerniñ imzalarınen Ukrayına bayrağını bergenine baqa, 2022 senesi dekabrniñ 21-i
Rusiye raketası Zaporijjâda evlerini yoq etkende apayı vefat etken adam ağlay, 2023 senesi yanvarniñ 25-nden 26-na keçer gecesi.
Balalar Kyiv civarındaki Glevaha şeerinde Rusiye raketa darbesinden iz yanında, 2023 senesi yanvarniñ 26-sı.