Almaniyanıñ Sotsial-demokratik firqasınıñ Bundestag azası Bärbel Kofler Rusiyeni Yaltadaki «Hizb ut-Tahrir davasınıñ» mabüsi Emir-Usein Kukunı azat etmesine çağırdı.
«Tutulmasınıñ beşinci yılında Rusiyeni aq qorçalayıcı Emir-Usein Kukunı azat etmesine çağıram. Onıñ adisesi qırımtatarlarnıñ taqip etilüvi ve Rusiye tarafından qanunsız işğal etilgen Qırımda insan aqlarınıñ bozuluvı içün bir alâmet. #FreeKuku #CrimeaIsUkraine», – dep yazdı Kofler Twitterde.
On the 5th anniversary of his detention, I call on Russia to release human rights defender Emir-Usein Kuku. His case is symptomatic for the persecution of Crimean Tatars and Russia%27s disregard for human rights in illegally occupied #Crimea . #FreeKuku #CrimeaIsUkraine
— Bärbel Kofler, MdB (@BaerbelKofler) February 11, 2021
ABD Ukraina elçihanesi Rusiyeni Emir-Usein Kukunı apisten azat etmesine çağırdı.
Büyük Britaniyanıñ Ukraina elçisi Melinda Simmons ve Britaniya parlamentiniñ azası Wendy Morton da Rusiyeni ukrainalı siyasiy mabüslerni, hususan Emir-Usein Kukunı azat etmesine çağırdı.
«Memorial» aq qorçalayıcı merkezi Emir-Usein Kukunı siyasiy mabüs dep tanıdı. 2020 senesi dekabr ayında onı Levko Lukyanenko Ukraina devlet stipendiyasını alması içün namzet köstergenler.
Emir-Usein Kuku – qırımtatar aq qorçalayıcısı ve faali. 2019 senesi noyabrniñ 12-nde Rusiyeniñ Cenübiy okrugınıñ arbiy mahkemesi onı «terror teşkilâtınıñ faaliyetini teşkil etkeninde» qabaatlap, 12 yılğa üküm etti. Amnesty International Kukunı vicdan mabüsi dep saya.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.