Ukrayinanıñ muzakere eyyeti erkânında olğan Prezident ofisiniñ yolbaşçısı Kırılo Budanov fevralniñ 18-nde Jenevada muzakerelerniñ nevbetteki raundı yekünlengenini izaatladı.
Onıñ aytqanına köre, subet "qolay olmadı, amma müim edi".
"Taqımımıznen beraber devam etmege azırlanamız – eñ yaqın vaqıtta. Dayanırmız!" – dep qoştı Budanov.
Ukrayina Tış işler nazirliginiñ vekili Ğeorğiy Tıhıynıñ tarif etkenine köre, muzakerelerde cenk, siyasiy ve gumanitar meselelerge diqqat ayırıldı.
ABD ve Rusiye ile üç taraflı muzakerelerniñ Ukrayina eyyet yolbaşçısı, MTMŞ kâtibi Rustem Umerov Jenevada yekünlengen muzakerelerni izaatlap, bazı meselelerde ilerilev olğanını bildirdi.
Ukrayina prezidenti Volodımız Zelenskıy ABD aracılığıgnen Rusiye vekillerinen körüşüvler Jenevada "qolay olmadı", dep bildirdi. Zelenskıy bunı jurnalistlerge Ukrayina gruppasınıñ İsviçrede eki kün devam etken muzakerelernen bağlı maruzasından soñ ayttı.
Zelenskıy muzakerelerniñ ilk kününi izaatlap, Rusiye endi finalğa çıqacaq olğan muzakerelerni sozmağa tırışa.
Moskvanıñ muzakerecisi, Rusiye prezidentiniñ yardımcısı Vladimir Medinskiy Rusiye devlet kütleviy haber vastaları ögünde çıqışta bulunıp, muzakereler "qıyın, amma iş" oldı ve körüşüvler devam etecek, dep ayttı.
Jenevada fevralniñ 17-nde ve 18-nde devam etken muzakereler – soñki ayda ötkerilgen üç taraflı körüşüvlerniñ üçünci raundı – Rusiyeniñ Ukrayinağa qarşı cenkni toqtatuv yolunda eki zor maniağa bağışlandı: topraq iddiaları ve telükesizlik kefaletleri.
Körüşüvler Rusiyeniñ büyük istilâsınıñ dördünci yılına bir afta qalğanda keçti.