Qırım akimiyeti, koronavirus yayılmasına qarşı küreşken Qırım ştabınıñ iş formatını deñiştirmege qarar aldı. Mayıs 26-sından başlap, malümat cemiyetke siyasetcilerniñ brifinglerinde berilecek.
"Yuquv adiseleri boyunca, körgen tedbirlerimiz boyunca dinamikamız teşkil etilgen olsa da, salı kününden başlap ştabnıñ işi başqa formatqa deñişecegi aqqında qarar aldıq. Malümatnı brifing rejiminde berecekmiz", - dedi operativ ştabınıñ oturışında Qırımnıñ rusiyeli başı Sergey Aksönov.
Sergey Aksönov
Aksönov, brifingler aftanıñ soñunda, cuma künlerinde keçirilercegini qayd etti.
Rusiye nezaretindeki Aqmescit şeer şurasınıñ sabıq mebusı Stepan Kiskinniñ fikrince, operativ ştabnıñ iş usulını deñiştirmek, lâkin er künlük işini qaldırmaq kerek edi.
"Menimce, ştabnıñ oturışları öyle de er kün keçirilmeli, çünki adamlarnıñ özüni izolâtsiya etüv rejiminden çıqması - pandemiyanıñ soñu degildir. Başqa bir mesele ki, ştabnıñ işini bütünley deñiştirmek kerek. Bu, er türlü meselelerni ve suallerni onlayn çeze bilgen bir canlı organ olmalı. Buña Rusiye prezidenti Putinniñ muşavereleri örnek olmaq mümkün, olarnıñ devamında bütün mesele ve vazifeler - işten çıqaruv ve işke tayin etmekke barğance - birden çezile edi", - dedi Qırım.Aqiqatqa siyasetçi.
Stepan Kiskin
Stepan Kiskin, qırımlılarnıñ ştabnıñ işine munasebeti eki türlü dep ayta.
"Ştabnıñ işini qıymet kesmek qıyındır, çünki pandemiyanen küreş daa yolnıñ ortasındadır. Ştab işiniñ özüne ise qırımlılar türlüce baqa: bazıları ümüt ile, başqaları tenqit ile. Bu, hususan, tibbiy işçilerge COVID parası tölenmegeninden soñ yahşı köründi. Amma, ümüt etem ki, akimiyet kerekli netice çıqarıp, niayet halq ve cemaatçılarnı eşitip başlar. Akis alda bizge böyle kör ve sağır akimiyet ne kerek?", - dedi siyasetçi.
"Azat Qırım" cemaat areketiniñ faali Emine İbraimova Qırım.Aqiqatqa tefsir bergende, qırımlılar operativ ştabnıñ işiniñ devamını ve mükemelleştirüvini körmek ister edi, dep ayttı.
"Aytılacaq bir şey bar: resmiy statistikağa köre, Qırimda koronavirusnıñ yayılması toqtatılmadı. Ve, matbuatnıñ malümatına köre, tibbiy hadimler hastalana. Tibbiy hadimlerniñ ve qırımlılarnıñ qoruv vastaları ile vaziyet qanaatlendirici degil. Ekimlerge - küreşniñ ög sıralarında olğan adamlarğa ödevlernen de problemalar bar. Bundan ğayrı, bazı tibbiy müessiselerde, Kezlev şeer hastahanesinde, misal içün, işçilerni asıl koronavirusqa teşkermediler. Qırım Sağlıq Nazirliginiñ zayıf işi birden körüne. Ştab yaratmaq ğayesi yahşı edi, amma icra etüvini yahşıca da yapmaq mümkün edi. Ştabnıñ işini yahşılaştırmaq yerine, onı qapattılar", - dep paylaştı fikrinen faal.
Emine İbraimova
Qırım faali, Aqmescit ekimi İrina Vronskaya, ştab esas vazifelerini becerdi ve hastalıqnıñ artqanını beklemek kerekmmey, dep saya.
"Bellesem, koronavirusqa qarşı ştabnıñ oturışlarınıñ er kün keçirilüvi toqtatılsa, demek vaziyet artıq kritik degil. Eñ azından buña ümüt etem. Ümüt etem, yaqın vaqıtta iç olmadım qırımlılar içün karantin tedbirleri toqtatılır. Karantinden soñ hastalıq adiseleri keskin sürette artacağında şübelenem. Adamlar supermarketlerde, naqliyatta, bazarlarda ve ilâhre alâqada buluna, amma hastalıq adiseler pek artmadı. Hastalarnı ve taşıyıcılarnı Qırımğa yibermeseler, er şey yahşı olacaq", - dedi faal.
"Azat Qırım" areketiniñ faali Marina İvanovağa köre, onıñ etrafındaki qırımlılar koronavirus pandemiyasından qorqmay.
"Qırımlılr operativ stabnıñ işine türlüce yanaşalar, çoqusı oturışlarnı meraq ile seyir etkenini bilem. Körgenime köre, qırımlılarnıñ çoqusı artıq televizorğa inanmay ve pandemiyanıñ telükeli olğanına da inanmay", - dedi faal.
Конец самоизоляции. Как прошла первая неделя без жестких ограничений в Крыму (фотогалерея)
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.