Rusiye prezidenti Vladimir Putinniñ spikeri Dmitriy Peskov, Kreml Ukraina prezidenti namzetlerinen Qırımnıñ kimge ait olğanını muzakere etmeycek, çünki «bu mevzu ebediyen qapatıldı», dep ayttı.
Bu aqta o, aprelniñ 1-nde Ukrainada prezident saylavlarında namzet köstergen, şoumen Volodımır Zelenskıynıñ Putin ile körüşse aytacaqlarını aydınlatqan soñ bildirdi.
«Mında Qırım aqqında laf etmege olmaz, dep tüşünemiz. Bu mevzu ebediyen qapatıldı», – dep tekrarlay Peskovnıñ aytqanlarını «İnterfaks» rus agentligi.
Your browser doesn’t support HTML5
Putinni körsem aytarım: niayet, topraqlarnı qaytardıñız – Zelenskıy (video)
Peskov Donbas aqqında aytıp, Kreml er bir Ukraina vatandaşına Rusiye «Ukraina topraqlarını işğal etmegenini» añlatmağa azır, dedi.
«Böyle laf da yoq, çünki Donbasnıñ tanılmağan cumhuriyetlerini Ukraina özü istemedi ve anda olğanlar Ukraina reberligi keçirgen siyasetniñ aqibeti ola», – dedi Peskov.
Aprelniñ 1-nde saat 12:00-da Ukraina Merkeziy saylav komissiyası martnıñ 31-nde Ukrainadak keçirilgen prezident saylavlarındaki protokollarnıñ 71,27%-nı teşkerdi.
MSK malümatına köre, Volodımır Zelenskıy birinci yerde qala – reylerniñ 30,46%-ı, ekinci yerde – Petro Poroşenko, o, reylerniñ 16,16%-nı qazandı. Soñra Yuliya Tımoşenko – 13,15%, Yuriy Boyko – 11,54%, Anatoliy Ğrıtsenko – 7,05%.
Zelenskıyge 4 mlndan ziyade vatandaş rey berdi, Poroşenkoğa – 2 mlndan ziyade. Tımoşenkoğa 1,7 mln ukrainalı qoltuttı, Boykoyğa – 1,5 mln.
Ukrainada martnıñ 31-nde prezident saylavları olıp keçti. Saylayıcılarnıñ 63,5%-ı rey berdi.
Milliy exit poll malümatına köre, Volodımır Zelenskıy 30,6%, Petro Poroşenko – 17,8%, Yuliya Tımoşenko – 14,2%, Yuriy Boyko – 9,7%, Anatoliy Grıtsenko – 7,1%, Aleksandr Şevçenko – 0,5% qazandı.
Merkeziy saylav komissiyası saylavlarnıñ soñki neticelerini aprelniñ 10-na qadar ilân etmeli. Ekinci tur aprelniñ 21-nde olacaq.