Rusiye ordusınıñ Ukrayinanıñ mustaqil toprağından halqara seviyede tanılğan sıñırları içinde çıqarılması Ukrayina prezidenti Volodımır Zelenskıynıñ barışıq formulasınıñ şartlarından biridir.
Böyleliknen memleketniñ Tış işler nazirligi Çehiya prezidenti Petr Pavelniñ, Kıyiv Ukrayinanıñ bazı topraqları Rusiyeniñ nezareti altında qala bile, dep aytqanına cevap berdi.
"İnsan ayatı, serbestlik, umumiy qıymetler, Rusiye cinayetleri içün adalet, halqara barışıq ve telükesizlik aqqında söz ketkende, yarım qarar olmaz, dep qayd etemiz. Bu kontekstte muvaqqat qararlar tam barışıqnı ğayrıdan tikleycek degil, yalıñız cenkni başqa vaqıtqa qaldıracaq", — dep aytıla beyanatta.
TİN-de Rusiyeni adaletli barışıqqa, Ukrayina topraqlarınıñ azat etilmesine ve halqara uquqqa riayet etmesine mecbur etmek içün oña qarşı basqını quvetleştirmek müim olğanını qayd ettiler.
Tış işler nazirliginde deyler ki, "bu, beraberlikte yapıp olğanımız kerçek bir stsenariy".
Bundan evel Çehiya prezidenti The New York Times amerika neşiri içün bergen intervyüsında Ukrayina "Rusiye tarafından işğal etilgen topraqlarnı qaytaruv istiqbali aqqında realist olmaq kerek" dep ayttı.
"Büyük ihtimalnen, cenkniñ neticesi, ukrayin topraqlarınıñ bir qısmı Rusiye işğali altında qalacaq", — dep ayttı o.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.