Rusiyeniñ Avropa Şurasındaki daimiy temsilcisi, elçi İvan Soltanovskiy, Avropa Şurası Nazirler kömitetiniñ işğal etilgen Qırımda insan aqları vaziyeti ile bağlı qararı «halqra munasebetlerniñ esas printsiperine ve teşkilâtnıñ nizamnamesine zıt kele», dep saya. Bunı o, TASS malümat agentligine bildirdi.
Elçiniñ fikrince, böyle bir qarar «Rusiyeniñ içki işlerine kirişüvdir, topraq bütünligine şübe yarata».
Qararnıñ metini ise, «Kyivniñ propaganda ile tolu beyanatlarına esaslanğan».
«Bu vesiqada Ukraina ve ğarbiy memleketler tarafından Qırım sakinleriniñ esas insan aqlarınıñ bozulması gizlidir», – dedi o.
Diger Rusiye diplomatları kibi o da, Ğarpnı Qırımnıñ «suv blokadasına» dair kollektiv reaktsiyası olmağanını takbih etti.
Soltanovskiy, Rusiyeniñ Avropa Şurasınıñ organlarına defalarca Rusiye ile alâqalı mandatları çerçivesinde monitoring missiyaları ile Qırımğa ziyaret içün davetnameler yollanğanını ayttı, amma «olarnıñ episi körmemezlikke uruldı».
«Ukraina qanunlarına bağlantılar ile qabul etilgen qarar Avropa Şurası delegatsiyalarınıñ Qırımğa yolculıqlarını imkânsız alğa ketire. Bu qararnı uquq ceetinden qanunsız sayamız. Bunıñ içün AŞNK Almaniyanıñ reisligi mesül», – dep qoştı o.
Yalıñız tintüvler degil: 2020-nci senede Qırımda insan aqları bozulmasınıñ foto delilleri (fotogalereya)
Mayısnıñ 11-nde Avropa Şurası Nazirler Komiteti «Qırım MC ve Aqyar şeerinde insan aqları vaziyeti » qararnı qabul etti.
Aprel ayında Ukraina TİN birinci muavini Emine Ceppar Avropa Şurası Nazirler komitetine Ukrainanıñ teşebbüsi liye teşkilâtnıñ Qırımda insan aqları bozuvları ile bağlı vaziyetniñ monitoringine dair işniñ faalleştirilüvi aqqında qarar leyhasını taqdim etti.
Aprelniñ 7-nde, çarşenbe künü, Kyivde ukrain uquq qoruyıcı teşkilâtlarnıñ temsilcileri Avropa Şurası insan aqları komissarı Dunâ Miyatoviç ile körüşüv vaqtında işğal etilgen Qırımdaki bozuvlar ve taqipler aqqında aytıp berdiler.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.