Aprelniñ 4-nde Kreml kontrolindeki Aqyar şeer mahkemesi «ukrain diversantları davasınıñ» ükmüni çıqardı. Eki mabüs – Vladimir Dudka ve Aleksey Bessarabov – 14 yılğa üküm etildi. Mahkeme er birine para cezasını da berdi: Dudkağa – 350 biñ ruble, Bessarabovğa – 300 biñ ruble.
«Nomos» Qırım analitik merkeziniñ hadimleri Dmitriy Ştıblikov, Aleksey Bessarabov ve yaqın dostu Vladimir Dudka 2016 senesi noyabrniñ 9-nda Aqyarda tutulğan edi. Üçü de Ukraina istihbaratınıñ isteginen Qırımda diversiya azırlağanında qabaatlandı. Ştıblikov qabaatını tanıp, 5 yılğa üküm etildi, Bessarabov ve Dudka ise qabaatlarını tanımadılar. Ukraina telükesizlik hızmeti olarnıñ bir de bir alâqası bar olğanını inkâr ete.
Jurnalist Taras İbragimov Kreml kontrolindeki Aqyar mahkemesi qabaatlayıcı üküm çıqaracağından emin edi.
– Prokuror Vladimir Dudka içün 15 yıl ve Aleksey Bessarabov içün 14 yıl ve 10 ay istegende mahkeme 2-3 yıl az berir, dep tüşüngen edim. Amma üküm qabaatlayıcı olacağından iç bir şübhem yoq edi. Aqmescit davası da bar, anda Andrey Zahtey ve Yevgeniy Panovğa daa yımşaq bir üküm çıqarılğan edi. Ne yazıq ki, FSB ve mahkeme yeñdi, bunı tanımaq kerek, çünki mına «diversantlar» bar, olar mahküm etildi – bazıları qabaatını tanıdı, bu tahqiqat içün pek müim ola. Asılında, bu davada o qadar sır bar. Aqyarda davanıñ ilk mahkemesi olğanda soy-soplarından biri 2016 senesi noyabr ayında Aleksey Bessarabovnıñ evinde tintüv keçirilgende o, masada bir kâğıt qaldırğan edi: «Vladimirniñ iç bir qabaatı yoq». Şu sebepten tuvğanları Dudkanıñ bu davağa iç bir alâqası yoq, dep israr ete.
Taras İbragimov
Vladimir Dudkanıñ advokatı Sergey Legostov şikâyetni on kün içinde temyiz etmege niyetlene ve qabaatlayıcı tara dava malümatları sahtelengenini tanıdı, dep qayd ete.
Qırımdaki «diversiya davaları» boyunca bu eñ sert üküm oldı. 14 yıl – büyük bir ceza.Sergey Legostov
– Dudka adiy bir arbiy degil edi – o, gemideki radio istihbaratında hızmet etti, 2010 senesi işten ayırıldı. Soñra Ukraina Fevqulâde vaziyetler nazirliginde ve daa soñra Rusiye Fevqulâde vaziyetler nazirliginde çalıştı. Oña aydınlatılğan qabaat içün pek kelişe edi. Qırımdaki «diversiya davaları» boyunca bu eñ sert üküm oldı. Belki, hata, tahqiqatnıñ sahte olğanını gizlemek, belki, mahkümlerni ve tuvğanlarını, qalğanlarını qorquzmağa isteyler. 14 yıl – büyük bir ceza. Olar, elbette, başqa bir şey beklemediler. Sözge çıqqanda olarğa Ukrainada qoltutqan er keske teşekkürler bildirip, qabaatlı olmağanlarını ayttılar. Bundan ğayrı, Aqyar prokuraturası ve Qırımdaki FSB İdaresiniñ yolbaşçısı adına soraştıruv ve tahqiqat keçirilgende mahkeme hata yapılğanını aydınlattı. Qabaatlayıcı taraf dava malümatlarınıñ bir qısmı sahte olğanını tanıdı. İmaye buña razı.
Sergey Legostov
Vladimir Dudkanıñ oğlu İlya Dudka üküm ne qadar sert olğanına şaşıp, babasınıñ sağlıq problemleri aqqında hatırlata.
Babamnıñ yaşı belli, deñiştirüv olmasa, bu bir taraflı bilet olurİlya Dudka
– Babamnıñ yaşı belli, deñiştirüv olmasa, bu bir taraflı bilet olur. Tutuv şaraitlerinden şikâyet etmey, tek tibbiyet yaramay. Babam içün bizden ilâc alalar, amma bu eski ilâclar, babam olarnı tutulğandan evel qullanğan edi. Babam hastahanede baqılğan soñ yañı bir şey berilmedi, demek ki, tek alâmetlerni bastıramız. SİZOda qan basımı yükselip başladı – 150-90 ola, em de aşqazan ülseri bar, erkek hastalıqları bar. Bir afta evelsi körüştik – sağlıq aqqında laf ettik, babam etap etilecegine azırlanıp başladı. Mahkeme izin berse, kelecek aftanıñ ilk yarısında kene körüşüvge baracam.
MALÜMAT: 2016 senesi noyabrniñ 9-nda Aqyarda «Nomos» Qırım analitik merkeziniñ hadimleri Dmitriy Ştıblikov, Aleksey Bessarabov ve yaqın dostu Vladimir Dudka tutulğan edi. Üçü de Ukraina istihbaratınıñ isteginen Qırımda diversiya azırlağanında qabaatlandı.
2017 senesi noyabrniñ 16-nda Aqyar şeer mahkemesi Ştıblikovnı 5 yıl sert rejimli koloniyada qalmasına ve 200 biñ ruble (95 biñ ğrıvnâ) para cezasına üküm etti.
2018 senesi iyülniñ 31-nde Kreml kontrolindeki Aqyar şeer mahkemesi aqyarlı Vladimir Dudka ve Aleksey Bessarabovnıñ apis cezasını altı ayğa uzattı.
Ukraina telükesizlik hızmetiniñ bildirgenine köre, Qırımda tutulğan Ukraina vatandaşları SBU hadimleri ya da hızmetçileri degil.
(Metinni Vladislav Lentsev azırladı)