Ukrayina ve Büyük Britaniya mudafaa nazirleri Rustem Ümerov ve Djon Gilli Ukrayina mudafaa imkânlarınıñ inkişafında kredit yardımı aqqında eki memleketniñ ükümetleri arasında añlaşmanı imzaladılar, dep haber ete Ukrayina prezidentiniñ ofisi iyülniñ 19-nda.
"Vesiqa bu saada ukrayin-britaniya leyhalarını başlamağa imkân berecek. Söz, hususan, ava mudafaası sistemalarınıñ, zırhlı tehnikanıñ, silânıñ teminlevi ve tamiri ve qısmen istisalı aqqında kete. Añlaşmanıñ şartlarına binaen, britaniyalı tedarikçiler Ukrayina ile 2 milliard funt sterlinglik kredit muqaveleleri ve añlaşmalar yapa bileler", — dep aytıla haberde.
OPU matbuat hızmeti qayd ete ki, bu miqdar soñki degil ve ileride arttırıla bile.
Añlaşmanıñ sayesinde 2026 senesine qadar Ukrayina Mudafaa quvetlerini ava mudafaası sistemaları ve radiolokatsiya ve zararlı vastalarnen temin etmek, em de tehnologiyalarnı elde etmek ve top, yedek parça ve artileriya qurulışları, ğarbiy örnekte zırhlı tehnika komponentleriniñ qısmen istisalını özleştirmek mümkün olacaq.
Ukrayina mudafaa naziri Rustem Ümerov, añlaşma qısqa müddette ukrayin ordusı içün kerekli silânı elde etmege imkân berecek, dep qayd etti.
Kredit 15 yılğa berile, onı uzatmaq mümkün, dep bildirdi Ukrayina Mudafaa nazirligi.
"Bu añlaşma memleketniñ mudafaa qabiliyetini quvetleştirüv strategiyamıznıñ esas qısımlarından biridir. Britaniya ortaqlarımızğa qol tutqanları içün minnetdarmız ve işbu ortaqlıq Ukrayinada telükesizlik ve barışıqnı temin etmege yardım etecegine eminmiz", — dep qoştı Ukrayina mudafaa naziri.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.