Qırımlı vatandaş jurnalisti ve aq qorçalayıcısı İrına Danılovıçqa qarşı yapılğan basqı aqqında BMT strukturalarına muracaat şimdilik bir netice bermedi, dep bildirdi Qırım.Aqiqatqa onıñ qardaşı Olga Novitskaya.
Onıñ malümatına köre, qulaq hastalığı olğan Qırımlı qadınğa er kün on eki saat devamında yüksek sesnen işkence yapıla.
"Onıñ qulağında daimiy bir sızğırıq bar, er bir çınqıltı elektrik telükesi kibi is etile ve işkencege çevirile. Amma, koloniya hadimleri saba saat 6-da televizornı yüksek sesnen köterip, aqşamğa qadar söndürmeyler. Onı özüni öldürtecek olalar, çünki er bir çalğan ses onıñ miyini kesip ala. Mümkün olğan er kesni bu vaziyetke kirişmege ve İrınağa sağ qalmağa imkân bermekni rica etem", — dep bildirdi Olga Novitskaya.
İlk yaznıñ 19-nda Sıñırsız mühbirler halqara teşkilâtı (RSF) Amerika İnsan aqları fondunen (HRF) beraberlikte Qırım jurnalisti İrına Danılovıçnıñ davasını BMT-niñ altı mahsus maruzacısına berdi ve onıñ sağlıq vaziyeti fenalaşqanı içün acele areket etmege çağırdı. Siyasiy mabüsniñ qız qardaşı qayd etkenine köre, planlaştırılmağan tintüvden ğayrı, koloniya memuriyeti tarafından bir reaktsiya olmadı.
Hatırlatamız ki, Sabannıñ 31-nde vatandaş jurnalisti İrına Danılovıçnıñ qız qardaşı Qırım.Aqiqatqa FSİN hadimleri "İrınanı maqsatlı olaraq ölüdürecek olalar", dep bildirdi. Daa evel İrına Danılovıçnıñ özü, apiske alınğan qadınlarğa, parlaq yarıqlar ve yüksek sesli muzıka ile işkence kibi, izsiz işkence qullanılğanını bildirgen edi. Koloniyada bu arizalardan soñ teşkerüv keçirildi, bir de bir bozuv tapılmadı.
2022 senesi Qırımlı jurnalist ve aq qorçalayıcı İrına Danılovıçnı FSB hadimleri qaçırdı. Daa soñra onı patlayıcı maddeler saqlağanında qabaatladılar, tahqiqat izolâtorında ise otit hastalığı sebebinden tibbiy yardım kösterilmedi. Neticede faalniñ bir qulağı eşitmey ve tedaviylenmey.
2024 senesi Armanda, koloniyağa kelgen soñ, Danılovıç qulaq ve baş ağrıları sebebinden tibbiy bölükke muracaat etti, amma cevap olaraq ekim Lidiya Morozova Danılovıç sağırlaşqan soñ, ağrı özü keçecegini bildirdi.