BMT Baş assambleyası Rusiye tarafından işğal etilgen Ukrayin topraqlarında, şu cümleden Rusiye tarafından işğal etilgen Qırım ve Aqyarda insan aqları vaziyetine dair yañartılğan beyannameni qabul etti, dep yaza Azatlıq Radiosı.
Vesiqanıñ qabul etilüvine 79 devlet qoltuttı, 16 memleket qarşı çıqtı, 73 bitaraf qaldı.
Rusiye, Belarus, Şimaliy Koreya, Qıtay, İran, Burkina-Faso, Eritreya, Sudan, Mali, Zimbabve, Burundi, Merkeziy Afrika Cumhuriyeti, Kongo, Ekvatorial Gvineya, Kuba, Nikaragua qarşı çıqtılar.
Tış işler naziri Andriy Sibiğanıñ aytqanına köre, Ukrayina bu qararnı 2016 senesinden berli er yıl teklif ete.
"Vesiqa Rusiyeniñ istilâsını qattı şekilde takbih ete, Ukrayinanıñ suvereniteti ve topraq bütünligini tasdıqlay ve cenkni deral toqtatmağa ve Rusiye ordusınıñ çıqmasını talap ete. Qarar insan aqları ve gumanitar uquqnıñ ciddiy bozuluvları boyunca halqara nezaretni quvetleştire ve mesüliyetke çekilmek kerekligini qayd ete", — dep yazdı o içtimaiy ağda.
Orta küz ayına qadar Qırımtatar resurs merkeziniñ aq qoruyıcıları bu yılnıñ başından berli 700-den ziyade insan aqlarınıñ bozuluvını qayd etti, şu cümleden Rusiye Federatsiyası tarafından ilhaq etilgen Qırımda tevqif etüv, apiske aluv, tintüv, sorğu, adaletli mahkeme aqqınıñ bozuluvı.