BM Havfsızlıq Şurası martnıñ 15-nde işğal altındaki Qırımnıñ vaziyetini muzakere etecek. Toplaşuv Rusiyeniñ yarımada işğaliniñ beş yılına bağışlana. Bu aqta Ukrainanıñ BM temsilciligi Twitterde bildire.
BM yanındaki Ukraina temsilciliginiñ spikeri Oleg Nikolenko «Ukrinform» haber agentligine izaat berip, toplaşuv Arria şeklinde keçirilecek, dep bildirdi. Anda tek Havfsızlıq şurasınıñ vekilleri degil de, diger BM aza devletleri ve ükümetten tış teşkilâtlarnıñ temsilcileri davet etilecek.
«Esas diqqat Rusiye istilâsına uquqiy ve siyasiy ceetten qıymet kesüvge, Rusiye Federatsiyasınıñ halqara uquqnı bozıp, Avropa telükesizlik mimarcılığına ketirilgen zararğa ayırılacaq. Aq qorçalayıcı meselesine de ayrı diqqat olacaq», – dedi diplomat.
Nikolenkonıñ qayd etkenine köre, bir sıra rezolütsiyağa baqmadan, Qırımda insan aqları bozula, BM Baş Assambleyasınıñ qararları ise yerine ketirilmey. Rusiye akimiyeti faal, jurnalist ve qırımtatarlarnı, «işğalcilerniñ yapqanlarına» qarşı çıqmağa cesaret etken Qırım sakinlerini taqip etmege devam ete. Diplomat Qırımda Aqmescit ve Qırımdaki Ukrain Pravoslav kilsesiniñ arhiyepiskopı Kliment tutulğanını da hatırlattı.
Ukraina diplomatınıñ fikirince, Kremlniñ qanunsız areketlerine halqara toplulıq lâyıq cevap bermeli.
«Mart-aprel ayında BM Havfsızlıq Şurasında reislik yapmağa başlağan Frenkistan ve Almaniya içün Ukrainanıñ vaqtınca işğal etilgen topraqlarındaki vaziyet müim ola, bu pek simvolik bir şey», – dep qayd etti o.
Rusiye istilâsı başlağanından berli BM Havfsızlıq şurasında bunıñ kibi beşinci tedbir ötkerile. Onıñ keçirilmesini Ukraina ve halqara ortaqları teklif ete, deli Nikolayenko.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.