Birleşken Milletlerdeki Ukraina eyyeti ilhaq etilgen Qırım ve Donetsk ve Lugansk vilâyetleriniñ işğal etilgen topraqlarındaki vaziyet meselesini BM Baş Assambleyasınıñ kün tertibine kirsetilmesine irişti.
Bunı Ukraina prezidenti Petro Poroşenko haber etti.
«BM Baş Assambleyası 73-ünci sessiyasınıñ kün tertibine «Ukrainanıñ vaqtınca işğal etilgen topraqlarındaki vaziyet» yañı maddesiniñ kirsetilmesinen bağlı iş muvafaq oldı. Bu bir sıra yañlış haberge baqmadan, Rusiyeniñ Qırım işğali ve Donbasta devam etken istilâsı aqibetleriniñ kerçeklerini dünya toplulığına bildirmege yardım eter. Qoltutqan er kes sağ olsun», – dep yazdı Poroşenko Facebookta.
Ukraina tış işler naziriniñ muavini Sergey Kıslıtsâ, işbu qararğa ancaq 13 memleket rey bermegenini bildirdi. 68 memleket qoltuttı, 48 – bitaraf oldı.
Вся російська рать в Генеральній Асамблеї ООН: 13....Росія програла бій Україні. Питання окупованих територій в порядку денному ООН. Білорусь, Вірменія, Казахстан... Питання? pic.twitter.com/S8L2l9UAOl
— Sergiy Kyslytsya (@SergiyKyslytsya) 21 сентября 2018 г.
Ukrainanıñ New Yorktaki BM Baş assambleyasında köterecek esas meselelerden biri Azaq deñizindeki vaziyet olacaq, dep bildirdi Ukraina tış işler naziri Pavlo Klimkin.
Poroşenko, BM Baş assambleyasınıñ sessiya işinde iştirak etmek içün bazarertesi künü, sentâbrniñ 24-nde, Amerika Birleşken Devletlerine yol alacağını ilân etken edi.