Dünya geoinformatika ve turğun inkişaf malümatları merkeziniñ geoinformatsion sistemaları mütehassısı, qırımlı Sergey Gaponnıñ fikirince, Qırımda suv resurslarına olğan munasebet deñişmeli, tek yañı quyularnıñ qazıluvına emiyet berilmemeli. O, bu problemni tek vaqtınca çezecek adım olur, dep tüşüne. Bu aqta o, Qırım.Aqiqatqa ayttı.
«Eñ yaqın vaqıtta yañı quyularğa ümüt etecekler, dep tüşünem. Bu bir yerge ketirmeycek bir yol. Quyular meseleni tek qısqa vaqıt içün çezecek. Bu aylar, bazı vaqıtları yıllar ola. Quyular muntazam sürette boşaltılacaq, quyular ket-kete daa az olacaq. Yañı quyular problemni uzun vaqıt içün al etemeycek», – dep ayta qırımlı Sergey Gapon.
Rusiye baş nazir muavini Marat Husnullinniñ aytqanına köre, Moskva sovetler zamanında olğan Qırımdaki yerastı suvlarınıñ yedekleri aqqında malümatnı qullana. Yañı raqamlar Aqmescit ihtiyacları içün yañı quyularnıñ qazıluvı bitken soñ, yılnıñ soñunda aydınlatılacaq, dep vade eteler.
Onıñ malümatına köre, «Rosgeologiya» yılnıñ soñuna qadar yarımadada 30 quyu qazmagha planlaştıra. Husnullinniñ aytqanına köre, 20 danesi suv ağlarına suv berip başlaycaq.
Husnullin yarımadada suv qıtlığı qırılılarnıñ «hırsızlığınen» bağlı, dep ayta.
Noyabrniñ 2-nde berilgen malümatqa köre, Aqmescit etrafında büyük suv yedekleri yoq, şunıñ içün akimiyet «daa beterine azır». Qırımnıñ Rusiye yolbaşçısı Sergey Aksenovnıñ tahminlerine köre, ealige suv berüv cedveli daa eñ az bir yıl olacaq.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.