Ukrayina bu afta ABDniñ cenkni toqtatuv teklifine cevap bermek kerek – anda ABDniñ Qırım ilhaqını tanıma ve Kyivni NATOğa kirüv namzetleri cedvelinden çıqaruv da bar. Bu aqta The Wall Streer Journal neşiri menbalarına esaslanıp yaza.
Ğarbiy memurlarnıñ aytqanına köre, bu ğayeler cumaaqşamı künü Parijde Trumpnıñ memuriyetinden yüksek seviyeli memurlar tarafından Ukrayina zenaatdaşlarına gizli vesiqada berildi. Olar bir künlik körüşüvde avropalı memurlarğa da taqdim etildi.
ABD Kyivniñ cevabını bekley, beklenilgeni kibi, cevap bu aftanıñ soñunda Londonda Amerika, Ukrayina ve Avropa şahıslarınıñ körüşüvinde seslendirilecek. Amerika, Avropa ve Ukrayina fikirleri aynı olsa, teklifler Moskvağa yetkizile bile.
ABD Devlet departamentiniñ yüksek seviyeli hadimi bazar künü ukrayinalılarğa taqdim etilgen ğayelerni Kyiv baqmaq kerek, «qabul ya da red et» teklifi dep adlandırdı. Memur «variantlar cedvelini» «muzakere ve çağıruv içün» taqdim etilgen edi. Milliy telükesizlik şurasınıñ vekili izaatlarğa cevap bermedi.
Baş kâtip Marco Rubio kelecek bir qaç afta devamında esas meselelerde ilerilev olmasa, muzakere ğayretlerini toqtata bile, dep bildirdi. Neşir yazğanına köre, bu Ukrayina ve Rusiyege basqı yapmaq içün yapıldı.
Aprelniñ 17-nde Parijde Ukrayina, ABD, Frenkistan, Büyük Britaniya ve Almaniya iştirakinen Rusiyeniñ Ukrayinadaki cenkini bitirüv meseleleri boyunca muzakereler oldı. Muzakerelerniñ nevbetteki basamağı bu afta Londonda olacaq.
Bundan soñ, aprelniñ 19-nda, Kreml «Pasha barışığını» ilân etken Rusiye prezidenti Vladimir Putinniñ beyanatını aydınlattı. Amma Ukrayina ve Rusiye onıñ bozuluvında bir-birini qabaatladılar.
Buña baqmadan, Ukrayina eñ az 30 künge ve müddetni uzatuv imkânınen vatandaş infrastrukturasına qarşı uzun mesafeli dron ve raketa darbelerinden vazgeçmege teklif etti. Ukrayina prezidenti qayd etkenine köre, Ukrayina ordusınıñ areketleri küzgü kibi olacaq – «sessizlikke sessizliknen cevap berilecek, Rusiye darbelerinden qorçalamaq içün bizim darbelerimiz olacaq».
Kreml aprelniñ 20-nde aqşam Putin aprelniñ 21-nden gece yarısından soñ «Pasha barışığını» uzatmağa emir bermedi, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.