Beyaz evniñ milliy telükesizlik meselelerinden mesleatçısı Djon Kirbi Rusiye akimiyetiniñ Rusiye Federatsiyasınıñ Kursk vilâyetinde ukrayin quvetleriniñ areketleri Ğarpnıñ Rusiyege qarşı cenki olğanı aqqında beyanatlarını "Rusiye teşviqatınıñ oşlu bir qısmı" dep adlandırdı.
"O (RF prezidenti Putin — QA) cenk başlağanından berli bunıñnen bağlı: Ukrayinağa kirmek kerek, NATO onı sarıp ala, ve NATO ve ABD tarafından Ukraiynağa qol tutuv Ğarp Rusiyege qarşı olğanını isbatlay; NATO Rusiyege qarşı; ABD Rusiyege qarşı. Bu episi saçmalıq", — dedi Kirbi avgustnıñ 12-nde Beyaz ev brifinginde.
Onıñ qayd etkenine köre, Ukrayinada yalıñız Ukrayinağa ücüm etken Rusiye quvetleri cenkleşe, Ukrayina ise tecavuzdan özüni qorçalay.
"Bu, Rusiyeniñ Ukrayinağa qarşı basqıncı cenkidir. Başından berli öyle edi... ve Putin bunı begenmese, biraz raatsız olsa, bu vaziyette qolay bir çare bar: o Ukrayinadan yoqalıp, bunı toqtata bile", — dep bildirdi o.
Avgustnıñ 12-nde prezident Volodımır Zelenskıy ve Ukrayina Silâlı quvetleriniñ baş komandanı Oleksandr Sırskıy ilk sefer Rusiyeniñ Kursk vilâyetinde Ukrayina Silâlı quvetleriniñ ücüm ameliyatını tasdıqladılar. Toplaşuvda Sırskıy bildirdi ki, Rusiye Federatsiyasınıñ tahminen biñ kvadrat kilometr toprağı Ukrayina Silâlı quvetleriniñ nezareti altında buluna.
Aynı şu künü Rusiyeniñ Kursk vilâyetiniñ valisi vazifelerini eda etken Aleksey Smirnov RF prezidenti Vladimir Putin ile körüşüvde Ukrayina Silâlı quvetleriniñ nezareti altında regionnıñ 28 meskün yeri olğanını bildirdi.
Rusiye prezidenti bildirdi ki, şimdi oña "Ukrayinanıñ barışıq planından vazgeçkeniniñ sebebi añlaşıla". Onıñ fikrine köre, Ukrayina "kelecekte muzakere vaziyetini eyileştirmege tırışacaq".
Rusiye kütleviy haber vastaları, blogerler ve akimiyet vekilleriniñ malümatına köre, Ukrayina ordusı avgustnıñ 6-nda Rusiyeniñ Kursk vilâyetine kirdi. O vaqıttan berli regionda uruşlar devam ete. Rusiyeniñ Kursk, Brânsk ve Belgorod vilâyetleriniñ akimiyeti regionlarda kontrterroristik ameliyat rejimini tayin etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.