Bağçasaray rayonında qurucılıq, mimarlıq ve dizayn kolleciniñ studentleri sınıfdaşını köteklegenler. Bu aqta işğal etilgen Qırımnıñ Rusiye Tahqiqat komitetiniñ idaresi ve Rusiye prokuraturası haber eteler.
«Aqımdaki seneniñ aprelniñ 9-nda saba içtimaiy ağlarnıñ monitoringi vaqtında genç qızlarnıñ, añlatılğanına köre, sınıfdaşını köteklegenini qayd etken video tapıldı», – dep aytıla Tahqiqat komitetiniñ haberinde.
Qayd etilgenine köre, Bağçasaray rayonınıñ tahqiqat bölüginiñ hadimleri adisenen bağlı bütün malümatlarnı bilmege tırışa.
«Zarar körgen qız ve anası tahqiqat bölügine ariza bergenler, al-azırda zıddiyet sebepleri, devamı, esasları ve çağına yetmegen qızğa ketirilgen yara seviyesini añlamaq içün olarnen tahqiqatçılar çalışa», – dep bildirdi Tahqiqat komiteti.
Alınğan ilk malümatqa köre, aprelniñ 7-nde olğan zıddiyet vaqtında qıznıñ beti sıdırılğan ve siyarıntılar peyda olğan. Aynı adise bir qaç kün evel de olğan eken.
Tahqiqat komiteti, kollec hadimleri gençler arasında profilaktika işini yapamı dep teşkerecek.
Kollec hadimleriniñ açıq izaatları yoq.
2019 senesi Aqyarda 16 yaşında genç yaşdaşını köteklegeninde qabaatlandı.