"Hizb ut-Tahrir davası" boyunca qabaatlanğan birinci Bağçasaray gruppasınıñ eki iştirakçisini - Enver Mamutov ve Remzi Memetovnı ceza izolâtorına (ŞİZO) oturttılar. Bunı, "Qırım bildemligi"niñ er aylıq körüşüvinde advokat Rustem Kâmilev ayttı.
"Sentâbr 24-ünden berli Enver ağa ve Remzi ağa bağlanıp olamaymız. Adamnı koloniyağa etap etseler, onıñ qorantasınen bağlanmağa, tuvğanlarına telefon etmege çaresi bar. Büyük ihtimal ile, olar ceza izolâtorında tutula, dep ayta bilem", - aytıp berdi Qırım.Aqiqat mühbirine advokat.
Daa evel Rustem Kâmilev haber ete edi ki, Enver Mamutov ve Remzi Memetov, Stavropol ülkesiniñ №11 koloniyasına avuştırıldı.
Birinci Bağçasaray "Hizb ut-Tahrir davası" boyunca mahkemelengen Zevri Abseitov, Enver Mamutov ve Remzi Memetovnı, Rostov-na-Donu SİZOsından ceza çekecek yerlerine etap ettiler.
2016 senesi mayısnıñ 12-nde Bağçasarayda Rusiye telükesizlik hadimleri musulmanlar, qırımtatarlarnıñ evleri ve yerli qavehanede bir sıra tintüvler keçirdi. Neticede Bağçasaraynıñ dört sakini: Zevri Abseitov, Remzi Memetov, Rustem Abiltarov ve Enver Mamutov tutulıp, terrorizmde qabaatlandı. Olar, Rusiyede terroristik dep tanılğan «Hizb ut-Tahrir» teşkilâtında iştirak etkenlerinde şübeli dep sayıla.
Your browser doesn’t support HTML5
В ожидании приговора. Последнее слово фигурантов бахчисарайского «дела Хизб ут-Тахрир» (видео)
2018 senesi dekabr ayında Şimaliy-Kavkaz okrugınıñ arbiy mahkemesi Enver Mamutovnı 17 yıl sert rejimli koloniyada qalmasına üküm etti, Ruslan Abiltarov, Remzi Memetov ve Zevri Abseitov 9 yıl sert rejimli koloniyada qalmasına üküm etildi.
Mabüslerden iç birisi qabaatını tanımadı. Olar cinaiy işniñ «siyasiy sebepleri bar», dep qayd etti.
İyülniñ 11-nde Rusiye Yuqarı mahkemesi dava mabüsleriniñ ükmüni deñiştirdi. Enver Mamutovğa 16 yıl ve 9 ay apis cezası berildi, Remzi Memetov, Rustem Abiltarov, Zevri Abseitovğa – 8 yıl ve 9 ay.