Qırımtatar resurs merkeziniñ idare reisi, Qırımtatar Milliy Meclisiniñ azası Eskender Bariyev deñişüv çerçivesinde azat etilgen qırımlı siyasiy mabüslerniñ sayısı pek az olğanını qayd etti ve bu problemniñ bir sistemligine diqqat ayırdı. Bu aqta Qırımtatar resurs merkezi haber ete.
"Ne yazıq ki, Qırım işğali başlağanından deñişüv vaqtında Rusiye apishanelerinden Ukrayinağa tek 12 qırımlı vatandaş siyasiy mabüsi qayttı", – dep qayd etti Bariyev.
Onıñ aytqanına köre, 2022 senesine qadar sekiz qırımlı azat etildi, soñra – daa dördü, olarnıñ arasında beşi qırımtatarı. Adları bu:
- Gennadiy Afanasyev (2 yıl SİZOda qaldı)
- Ahtem Çiygoz (2 yıl ve 11 ay SİZOda qaldı)
- İlmi Umerov (çıqmamaq şartınen)
- Oleg Sentsov (5 yıl ve 3 ay SİZOda qaldı)
- Aleksandr Kolçenko (5 yıl ve 3 ay SİZOda qaldı)
- Yevgeniy Panov (3 yıl ve 1 ay SİZOda qaldı)
- Vladimir Baluh (2 yıl ve 9 ay SİZOda qaldı)
- Edem Bekirov (9 ay SİZOda qaldı)
- Nariman Celâl (aman-aman 3 yıl Rusiye apishanelerinde qaldı)
- Leniye Umerova (aman-aman 3 yıl Rusiye apishanelerinde qaldı)
- Konstantin Davidenko (7,5 yıl Rusiye esirliginde qaldı)
- Yaroslav Balitskiy (aman-aman 2 yıl Rusiye apsinde qaldı)
BM deñiz uquqı halqara mahkemesiniñ qararına köre Qırımnıñ beş siyasiy mabüsi azat etildi: Oleg Sentsov, Aleksandr Kolçenko, Yevgeniy Panov, Vladimir Baluh, Edem Bekirov.
Diger deñişüvler çerçivesinde daa beş qırımtatar arbiyi azat etildi: Asan İsenaciyev, Eldar Menumerov, Eldar Penya-Şemsedinov, Ruslan Kurtmallayev, Eskender Kudusov.
"Aynı vaqıtta Rusiye qırımlı siyasiy mabüslerniñ, hususan qırımtatarlarnıñ deñişüv cedveyellerine kirsetilmesinden aselet qaçına. Bu mesele Ukrayina tarafından eñ yüksek seviyede muzakereler vaqtında köterilgen edi", – dep qayd etti Bariyev.
Qırımda Rusiye uquq qoruyıcıları tarafından tutulğan qadınlarnıñ sayısı pek tez artqanını köz ögüne alsaq, Bariyev muzakereler vaqtında ağır hastalarnen beraber esli-başlı insanlar ve çoq balalı ana-babalarğa diqqat ayırmaq kerek, dep tüşüne.
Hatırlatamız, Qırımtatar resurs merkeziniñ malümatına köre, al-azırda apishanelerde (koloniya ve SİZOlarda) 354 insan buluna, 181-i – qırımtatarlar. Bu adiy raqamlar degil, bir cedvel bar, bugün Rusiye istilâcısınıñ elinde olğan er bir insannıñ adı ve soyadı qayd etile.
Rusiye ve Ukrayina akimiyetleri bu malümatnı şimdilik izaatlamadılar.