İşğal etilgen Qırımnıñ Rusiye akimiyeti Bağçasaraydaki Hansarayda "sergi meydançığını" donatacaq, anda ziyaretçiler "atiqiyatçılarnıñ qazma işleri vaqtında tapılğan şeylerni" köre bilecekler. Bu aqta TASS Qırımnıñ Rusiye medeniyet nazirligine atıf etiğ bildire.
Rusiye akimiyeti "restavrasiya işlerini" alıp barğan Hansarayda qazma işleri vaqtında, dekorativ süslemeler ile hamam qalımtıları, XVII-XVIII asırlarğa ait suv borusınıñ keramika boruları, em de keñ numizmatik materiallar tapılğan.
"Açılğan obyektler içün müzeyleştirüv leyhası azırlanıla. Leyha, atiqiyat qatlarnıñ numayışını ve ziyaretçiler içün raatlıq alanını birleştirgen keniş sergi meydançığınıñ meydanğa ketirilmesini közde tuta. Bundan da ğayrı, zemaneviy tehnologiyalar qullanılması planlaştırıla, meselâ, qazma esnasını añlatqan ve bütün obyektniñ tarihiy körünişini tiklegen interaktivler. Meydançıqtan saray obyektlerine keñ manzara açılacaq, müelliflerniñ ğayesine köre, olarnıñ unikalligini qayd etecek", — dep aytıla TASS soravına berilgen cevapta.
Hatırlatamız ki, "restavrasiya" 2017 senesi başlandı, o vaqıt Aksönov leyhağa 1,6 mlrd ruble ayırılacağını bildirdi. Olarnı üç yıl içinde, 2020 senesine qadar bitirmekni planlaştıra ediler. Şimdi ise 2027 senesinde bitirilmesi planlaştırıla.