Rusiye Cenübiy okrugınıñ arbiy mahkemesi "Bağçasaraydaki qırımlı musulmanlar davasınıñ beşinci gruppa" mabüsleri Remzi Nimetullayev, Ruslan Asanov, Amethan Umerov, Seydamet Mustafayev, Eldar Yakubov ve Abdulmecit Seytumerovnıñ apis müddetini uzattı. Apiste qaluv müddetleri avgustnıñ 23-ne qadar uzatıldı, dep bildirdi advokat Emil Kurbedinov "Qırım birdemligi" cemaat birleşmesine.
Qadılardan biri hastalanğanı içün oturışuv lâğu etildi, tek apis müddetini uzatuv meselesi baqıldı.
"Prokuror [uzatuv muracaatında] tahminlerini ayttı. Kene formal, bir delil olmadı. Olar [mabüsler] saqlana, şaatlarğa tesir ete bile eken, amma bütün şaatlar sorğuğa çekildi ve qabaatlav delilleri taqdim etildi", – dep Emil Kurbedinov.
Nevbetteki oturışuv mayısnıñ 25-nde olacaq. İmaye delil köstermege devam etecek, dep bildirdi advokat.
«Qırım platforması» sammitiniñ ertesi künü, 2023 senesi avgustnıñ 24-nde, Qırımda Rusiye uquq qoruyıcıları altı qırımtatarını tuttı. O künü saba Bağçasarayda ve Bağçasaray rayonında Remzi Nimetulayev, Ruslan Asanov, Seydamet Mustafayev, Amethan Umerov, Eldar Yakubov ve Abdulmecit Seytumerovnıñ evlerinde tintüvler keçirildi.
Aynı şu künü Rusiye kontrolindeki Aqmescitniñ Kiyev rayon mahkemesi üçüni apiske aldı – Ruslan Asanov, Amethan Umerov ve Remzi Nimetulayev eki ayğa SİZOğa yollanıldı. Tutulğanlar Rusiye Federatsiyası Ceza kodeksiniñ 205.5-nci maddesiniñ birinci qısmı – terrorcı teşkilâtnıñ faaliyetini teşkil etmek ve böyle teşkilâtnıñ faaliyetinde iştirak etmek – şübhesinen qabaatlandı. Laf Rusiyede yasaqlanğan «Hizb ut-Tahrir» teşkilâtı aqqında kete.
Bu yıl fevral ayında Rostov-na-Donu Cenübiy okrugınıñ arbiy mahkemesi Bağçasaraydaki beşinci "qırımlı musulmanlar davası" mabüsleriniñ apis müddetini mayısnıñ 23-ne qadar uzattı.