Rostov-na-Donu şeerinde "Bağçasaraydaki beşinci gruppanıñ" mabüslerine Rusiyede yasaqlağan "Hizb ut-Tahrir" teşkilâtını qurğanında ve iştirak etkeninde qabaatlavınen büyük apis cezaları berildi. Bu aqta Rusiye Cenübiy okrugınıñ arbiy mahkemesiniñ matbuat hızmeti haber ete.
Ruslan Asanov ve Remzi Nimetullayev Rusiye Federatsiyası Ceza kodeksiniñ 205.5 maddesiniñ 1-inci qısmı, 30 maddesiniñ 1-inci qısmı, 278 maddesine istinaden mahküm etildi, Seydamet Mustafayev, Amethan Umerov, Abdulmecit Seytumerov ve Eldar Yakubov ise Rusiye Federatsiyası Ceza kodeksiniñ 205.5 maddesiniñ 2-nci qısmı, 30 maddesiniñ 1-inci qısmı, 278 maddesine istinaden mahküm etildi.
Mahkeme malümatına köre, Asanov ve Nimetulayev Qırımnıñ Bağçasaray rayonında (Rusiyede yasaqlanğan – Qırım.Aqiqat) diger mabüsler de qoşulğan ("Hizb ut-Tahrir al-İslâmi") "İslâm serbestligi firqası" terror teşkilâtınıñ bölük faaliyetini teşkil etti".
"Asanov ve Nimetulayev teşkil etken ve keçirgen gizli toplaşuvlarda bölük faaliyetiniñ meseleleri, siyasiy sistemanı ve devlet qurumlarını, hususan Rusiyedeki sistemanı olarnı "Dünyanıñ islâm hilâfetine" qoşumaq maqsadınen deñiştirmek niyetleri, milliy devletlerniñ sıñırlarını em teşviqat, em zorbalıq yollarınen bozmaq çağıruvları muzakere etildi", – dep bildirdi mahkemeniñ matbuat hızmeti.
"Suspilne Krım" haber etkenine köre, qabaatlanğanlar oturışuvda video vastasınen iştirak etti. Ükümden evel beşi de sözüni aytıp, terrorizm ve akimiyetni zorbalıqnen zapt etüv qabaatlavlarını red etti ve davanı sahte ve siyasiy sebepli dep adlandırdı. Remzi Nimetulayev soñki sözüni aytmağa istemedi.
Eldar Yakubov imaye delilleri red etildi, şaatlar ise terror faaliyetine alâqası olmağanını tasdıqladı, dep bildirdi: "Bizni terrorizm ve akimiyetni zorbalıqnen zapt etüv ıntıluvlarında qabaatlav yaşayışımızğa bütünley zıt kele".
Abdulmecit Seytumerov 2014 senesinden berli musulmanlarğa qarşı cinaiy davalarnıñ "toqtamağanını", aynı ibareler, gizli şaat ve şübheli ekspertizalar qullanılğanını ayttı.
Amethan Umerov böyle dedi: "Men terrorist degilim. Men beklemege bilgen halqnıñ oğlu olam".
Ruslan Asanov silâsız altı insannıñ akimiyetni zapt etmege azırlanğanında qabaatlanğanını saçma dep adlandırdı.
Seydamet Mustafayev esnasnı "bir taraflı oyun" dep adlandırdı.
Rusiye mahkemesiniñ ükmüne köre, Ruslan Asanov 19 yıl sert rejimli koloniyada qalmasına (4 yılı apishanede keçecek), Remzi Nimetulayev 18 yıl apis cezasına üküm etildi. Seydamet Mustafayev, Amethan Umerov, Eldar Yakubov ve Abdulmecit Seytumerov – 15-er yıl (4 yılı apishanede keçecek). Üküm işke tüşürilmedi ve taraflar onı İstinaf arbiy mahkemesinde şikâyet etecek.
Hatırlatamız, "Bağçasaraydaki beşinci gruppanıñ" mabüsleri 2023 senesi avgust ayından berli apiste buluna. Beşi cemaat faali ve çoq balalı baba ola. Aq qorçalayıcılar ve soy-soplar taqiplerni diniy ve milliy alâmetlerine köre siyasiy sebepli dep saya. Qırım.Aqiqat haber etkenine köre, oktâbrniñ 20-nde mabüslerniñ soy-sop ve dostlarını oturışuvdan evel Keriç köpründe 12 saattan çoq tuttılar.