Elina Mamedovanıñ davası 2019 senesi yanvarniñ 17-nde qapatıldı. Rusiye Ceza kodeksiniñ 282-nci maddesi qısmen yımşatılğanı içün «VKontakte» içtimaiy ağında üç yazını paylaşqanında qabaatlanğan Elina qabaatsız sayıla, çıquv yasağı lâğu etildi, qıznıñ adı ise «Rosfinmonitoringniñ» saytında terrorist ve ekstremistler cedvelinden alıp taşlandı. Birinci tintüvden soñ sekiz ay keçkende özüni niayet serbest is etkenini ayta.
Elina külümsirey, çoq şaqa ete ve musafirlerini bayram tatlısınen sıylay – şimdi qayd etilecek şeyler bar, dey. Köçüv lafları başlağanda qız omuz kötere: «Ketmege tüşüngen edim. Amma ömür boyu Qırımda yaşadım, anam-babam mında, evim, bütün ayatım. Mışıqlarım olmasa, ne yapacam?».
Elina Mamedova evde
Mamedovlarnıñ evinde on mışıq, üç köpek bar, papağan tolu issihane tura. Elina bizni kezdire. Soñ aylanıp ayta: «Bularnı nasıl qaldırıp keterim? Ve ne içün ketecem? Birisi meni cinayetçi dep sayğanı içünmi?».
Pardoş Arçi
Papağanlar issihanesi
Yazda Elinanen laf etkende onı qomşuları «çaqtı», dep tahmin etken edi. Bu tüşünceleri doğru eken:
«Evimde birinci tintüv keçirilgen soñ olarnen laf etken edim. Tahqiqatçı özü saifelerni baqıp çıqa edi, degenler, menimkine rastkelip, bu yazılarnı körgen eken. Hadim oturıp, «VKontakte» yazılarımnı 2014 senesine qadar saifelegenini tasavvur etem. Olar (qomşular) bütün qasabanen endi qavğa etti».
Elina Mamedovanıñ azbarından manzara
Elina birinci mahkeme oturışuvını hatırlap, Yalta şeer mahkemesiniñ binasına oña qoltutmağa kelgen insanlarnıñ sayısı onı şaşırdı, dep ayta:
«Mahkemege ketkende biraz keç qala edim. Ana-babamnı almadım, evde beklesinler dedim. Amma yaqınlaşqanda bir sıra adamnı kördim – em tanış soylarını, em tanış olmağanlarnı, – şaşırdım, ebet. Sekiz ay devamında küçlü destek olğanını is ettim. Maña er vaqıt yaza ediler ve içtimaiy ağlarda yazmağa devam eteler».
Elina Mamedova eviniñ azbarında
Qıznıñ aytqanına köre, eñ çoq anası ve qartanası qasevetlene ediler – «belki de, menden ziyade».
Lutfiye Mamedova, Elinanıñ anası, evlerinde keçirilgen ekinci tintüvni hatırlay: «Kene ne içün keldiñiz, dedim? Madde yımşatıldı. O, (tahqiqatçı) dey: «Birinci oquvda, bir şey aytmağa daa erte». Ve qoşa: «Elbette, bitkenine quvanamız. Bu adaletsiz bir şey, pek adaletsiz. Bu paylaşuv, buña alışmadıq. Fikirlerimizni istegenimiz kibi bildire bilemiz, buña alıştıq. Fikirlerimiz içün cezalanacağımızğa alışmadıq. Mında ise cezalay ekenler».
Elina anası Lutfiyenen
Elina deñizge barıp kelmege teklif ete. Özüni soñki kününe qadar serbest is etmegenini ayta:
«Kene yahşı, SİZOda ya da ev apsinde degil edim. Amma bu vaziyet maneviy ceetten pek tesir etti. Bir qaç kün aşap olamay edim, siñirlengenimdendir».
Elina Mamedova Yalta yalısında
Tintüvler keçirilgen ve dava açılğan soñ Elina dostu Elmaznen tanıştı, arqadaşı aytqanlarını hatırlay:
«Elina, endamıñ pek güzel, o qadar ince bellisiñ, dedim. O maña cevap bere: Azğanımnıñ sponsorı – FSB ve Ceza kodeksiniñ 282-nci maddesi» – ve küle».
Mamedovanıñ aytqanına köre, sekiz ay devam etken esnasnıñ eñ güzel neticesi – insanlar:
Mışıqlardan ğayrı bir şey paylaşmağa tevsiye etmez edim
«Bütün bular olmasa edi, maña dost olğan o qadar açıq göñülli, merametli insanlarnı tanımaz edim. Pek begengenimni aytıp olamayım, amma insanlarnen munasebetler ceetinden güzel bir tecribe oldı. Aytmağa istegenim, «VKontakteni» qullanmañız, silinmege çareñiz olmasa – bütün yazılarıñıznı baqıp çıqıñız, mışıqlardan ğayrı bir şey paylaşmağa tevsiye etmez edim».
Your browser doesn’t support HTML5
«Maneviy ceetten pek qıyın» – Elina Mamedova davası qapatılğan soñ (video)