Azerbaycan arbiyleri cuma künü, noyabrniñ 20-nde, 25 yıldan berli öz-özüni ilân etken ve Ermenistan tarafından yardım alğan Dağlıq Qarabağ cumhuriyetiniñ kontroli altında qalğan Ağdam şeerine kirdi, dep haber ete Azatlıq Radiosı.
Azerbaycan mudafaa nazirliginiñ haberinde aytılğanına köre, arbiyler daa evel tizilgen Dağlıq Qarabağ alanındaki barışıq añlaşmalarına köre Ağdam rayonına kirdi.
Ermenistan, Azerbaycan ve Rusiye liderleriniñ añlaşmasına köre, Ağdam rayonı noyabrniñ 20-ne qadar Azerbaycan tarafına berilmeli – yani añlaşmalarğa riayet etildi. Ermenistan arbiyleri ve vatandaş ealisi rayonnı terk etti.
Kütleviy haber vastalarında ve içtimaiy ağlarda Ağdamdaki Azerbaycan arbiyleriniñ fotoresimleri derc etile.
Şeer Dağlıq Qarabağda degil, ondan şarqta yerleşe. Sovetler zamanında ealisi 20 biñden çoq edi, ekseriyeti azeriler edi. Eñ belli müessisesi Ağdam konyak zavodı edi.
Ermeni küçleri 1993 senesi şeerni aldı. Azerbaycan ealisi onı terk etti, şeer büyük zarar kördi. Soñki vaqıtları anda tek bir qaç yüz insan yaşay edi. Cuma künü Azerbaycan prezidenti İlham Aliyev milletke muracaat etip, şeerni ğayrıdan tiklemege ve qaçaqlarnıñ qaytmasını temin etmege söz berdi.
Bir sıra haberge köre, Ağdamda barışıqnı kontrol etecek Rusiye-Türkiye merkezi yerleşe bile, faqat şimdilik bu malümat tasdıqlanmadı.
Añlaşmalarğa köre, Ermenistan sıñırındaki Kelbacar rayonı da Azerbaycan kontroline qaytacaq edi, lâkin onı berüv müddeti noyabrniñ 25-ne qadar uzatıldı. Dekabrniñ 1-nde Azerbaycanğa Laçin rayonı (Lariç koridorından ğayrı) berilecek. Rusiye arbiy barışıq quvetleri yerleşken Dağlıq Qarabağnıñ büyük qısmı kene de Azerbaycan kontrolinde degil.
Añlaşmalar Azerbaycan içün muvafaqiyetli bitken cenk uruşlarınıñ soñu oldı. Mezkür cenk uruşları neticesinde Şuşa şeeri ve Qarabağdaki rayon merkezleri keri alındı.