Qarasuvbazarlı faal, 59 yaşında qırımtatarı Azamat Eyupov ekimler tarafından baqılmalı ve nevrolognıñ mesleatını almalı. O, bir qaç insult keçirgen edi, dep haber etti advokat Yevgeniy Goroşko «Qırım birdemligine».
«Eyupovğa soy-sopları apishanege ilâce ketire. Amma ciddiy seviyede teşkerilmeli», – dedi o.
Qayd etilgenine köre, SİZOda tutulğanda erkek dört işemik insult keçirdi. Tibbiy yardım kösterilmegeni içün Eyupov yardımsız yürip olamay edi.
Qırımlı apishanege etap etilgen soñ ömür arqadaşına telefon etip, oğrağan hastalıqları sebebinden sağ ayağı yahşı çalışmay, dep tarif etti.
Advokat Emil Kurbedinov tibbiy baquv yapılsın dep, SİZOğa muracaat etken edi. Feldşer östeohondroz bar dep, onı minimal tedaviylev kamerasına keri qaytardı. İyul ayında qorçalayıcı soy-soplarınıñ parasına şahsiy hastahanede baqılmasını talap etip oldı. Mustaqil ekimler izolâtorda dört işemik insult keçirgenini ve acele hastahanege alınmaq kerek olğanını ayttı.
2021 senesi fevral ayında Qırımda Qarasuvbazar, Bağçasaray, Aqmescit, Aqyar ve İçki rayonında kütleviy tintüvler keçirildi. Lenur Seydametov, Timur Yalkabov, Azamat Eyupov, Yaşar Şihametov, Ernest İbragimov ve Oleg Fedorov evlerinde keçirilgen tahqiqat tedbirlerinden soñ Qırımdaki FSB idaresine ketirildi. Soy-soplarına FSB tahqiqatçıları tutulğanlar Rusiye Ceza kodeksiniñ 205.5 maddesine istinaden qabaatlana. Qırımtatarlar Rusiyede yasaqlanğan, amma Ukrayınada ve bir çoq memlekette milliy qanunlar seviyesinde sıñırsız çalışqan «Hizb ut-Tahrir» teşkilâtı ile alâqaları bar olğanında qabaatlandı.
2022 senesi mayıs ayında Rostov-na-Donunıñ Cenübiy okrugınıñ arbiy mahkemesi ekinci Aqmescit «Hizb ut-Tahrir davasınıñ» mabüsleri Tofik Abdulgaziyev, Vladlen Abdulkadırov, İzzet Abdullayev, Mecit Abdurahmanov ve Bilâl Adilovnıñ qabaatlayıcı ükümlerini çıqardı. Müddetleri – 12 yıldan 14 yılğa qadar.
«Memorial» aq qorçalayıcı merkezi 2019 senesi martnıñ 27-nde Qırımda tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.