Rusiye akimiyeti tarafından 17 ve 12 yılğa üküm etilgen «qırımlı musulmanlar davasınıñ» mabüsleri Azamat Eyupov ve Vladlen Abdulkadırov acele tibbiy yardımğa muhtac. Bu aqta Ukrayına Yuqarı Radası insan aqları vekâletlisi Dmıtro Lubinets bildirdi.
«17 yılğa qanunsız bir şekilde azatlıqtan marum etilgen 60 yaşında qırımlı siyasiy mabüs Azamat Eyupov apiste dört mikroinsult keçirdi ve şimdi zornen areket ete. Erkekniñ sırt ve qan basımı problemleri bar. Lâkin Rusiye ekimleri onı simulâtsiyada qabaatlay ve bir yardım köstermege razı olmay. Diger siyasiy mabüs Vladlen Abdulkadırovnıñ da sağlıq vaziyeti fenalaşa», – dep yazdı Lubinets Telegram kanalında.
Ukrayına ombudsmeni qayd etkenine köre, 186 qırımlı siyasiy mabüsten eñ az 30 kişiniñ sağlıq vaziyeti kritik ve acele tedaviylenmeli.
«Bu insanlarnı qurtaracaq yekâne usul – olarnı azat etmek!» – dep qoştı Lubinets. O, dünya toplulığını «Rusiye Federatsiyası tarafından halqara gumanitar uquq normalarınıñ bozıluvına qararlı bir şekilde cevap bermege ve qanunsız apiske alınğan Ukrayına vatandaşlarınıñ tez vaqıtta azat etilüvini talap etmege» çağırdı.
Daa evel berilgen malümatqa köre, Rusiyeniñ Cezalarnı yerine ketirüv federal hızmeti 17 yılğa üküm etilgen qırıtatar faali Azamat Eyupovnı Çelâbinsk vilâyetiniñ Verhneuralsk şeeriniñ apishanesine etap etildi.
SİZOda tutulğan vaqıtta siyasiy mabüs dört işemik insult keçirdi. İlk sefer hastalıq alâmetleri aqqında Eyupovnen bir kamerada yatqan Ruslan Suleymanov bıltır mayıs ayında bildirdi. Tibbiy yardım kösterilmese, Azamat Eyupov yardımsız areket etip olamay.
2021 senesi fevral ayında Qırımda Qarasuvbazar, Bağçasaray, Aqmescit, Aqyar ve İçki rayonında kütleviy tintüvler keçirildi. Lenur Seydametov, Timur Yalkabov, Azamat Eyupov, Yaşar Şihametov, Ernest İbragimov ve Oleg Fedorov evlerinde keçirilgen tahqiqat tedbirlerinden soñ Qırımdaki FSB idaresine ketirildi. Soy-soplarına FSB tahqiqatçıları tutulğanlar Rusiye Ceza kodeksiniñ 205.5 maddesine istinaden qabaatlana. Qırımtatarlar Rusiyede yasaqlanğan, amma Ukrayınada ve bir çoq memlekette milliy qanunlar seviyesinde sıñırsız çalışqan «Hizb ut-Tahrir» teşkilâtı ile alâqaları bar olğanında qabaatlandı.
«Qırım birdemligi» bildirgenine köre, Rusiyede mahküm etilgen qırımlı faal Vladlen Abdulkadırovnıñ sırt ağrıları başladı.
Siyasiy mabüsniñ ömür arqadaşı Gulzarnıñ aq qorçalayıcığa bildirgenine köre, ağrılar Novoçerkassktan Rusiyeniñ Lipetsk vilâyetiniñ Yeltsteki №2 apishanesine etap etilgen soñ küçlendi.
2022 senesi mayıs ayında Rostov-na-Donunıñ Cenübiy okrugınıñ arbiy mahkemesi ekinci Aqmescit «Hizb ut-Tahrir davasınıñ» mabüsleri Tofik Abdulgaziyev, Vladlen Abdulkadırov, İzzet Abdullayev, Mecit Abdurahmanov ve Bilâl Adilovnıñ qabaatlayıcı ükümlerini çıqardı. Müddetleri – 12 yıldan 14 yılğa qadar.
«Memorial» aq qorçalayıcı merkezi 2019 senesi martnıñ 27-nde Qırımda tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.