Avropa komissiyasınıñ prezidenti Ursula fon der Lâyyen çarşenbe künü, iyulniñ 15-nde, Ukrayinanı ziyaret etti – Rusiyeniñ büyük istilâsı başlağanından bu onıñ Ukrayina paytahtına 11-inci ziyareti ola.
"Bu hususiy an. Ukrayina küçlü arbiy impuls aldı. Vaziyet deñişe. Mudafaa sanayımıznıñ integratsiyasıneyen bağlı yañı teşebbüslerni ilân etecem. Daa çoq ve tez yapacaqlarımıznı", – dep yazdı o, X içtimaiy ağında.
Ursula fon der Lâyyen Ukrayinanıñ Avropa Birligine kirüv ve bu qışqa azırlanğanına dair muzakerelerni ilân etti.
Ukrayina Tış işler naziri Andriy Sıbiğa Avropa komissiyasınıñ prezidenti ve Cenübiy-Şarqiy Avropa memleketleriniñ liderleri Ukrayina prezidenti Volodımır Zelenskıynen semereli muzakere içün körüşecekler, dep bildirdi.
"Ortaqlığımıznı ve Avropa Birligi yolunda işbirligimizni tasdıqlamaq içün beşinci Ukrayina-Cenübiy-Şarqiy Avropa sammitini keçirecekmiz. Fokusta: Avropanı pekitmek içün beraber yapılğan iş, çoq taraflı siyasiy işbirlik ve telükesizlik ve mudafaa saasında işbirligini pekitüv", – dep qoştı o.
Sıbiğanıñ aytqanına köre, Kyivde Beşinci Ukrayina-Cenübiy-Şarqiy Avropa sammitiniñ keçirilüvi Atina, Tirana, Dubrovnik ve Odesada bu formattaki körüşüvlerniñ mantıqlı devamı ola.
İyulniñ 15-nde saba Kyivge kelgenler arasında Moldova prezidenti Maya Sandu, Romaniya prezidenti Nikuşor Dan, Hırvatistan baş naziri Andrey Plenkoviç.
2023 senesi başlatılğan Ukrayina-Cenübiy-Şarqiy Avropa formatınıñ maqsadı regional işbirligini pekitip, Rusiyeniñ Ukrayinağa qarşı cenkiniñ zor aqibetlerinen bütün regionnıñ telükesizligi içün küreşmek. Bıltır sammit Odesada keçti.