Avropa elçileri Rusiyeniñ Rostov-na-Donu mahkemesiniñ Qarasuvbazardaki «Hizb ut-Tahrir davasınıñ» mabüsleri, qırımtatar musulmanları Enver Ömerov, Riza Ömerov ve Ayder Cepparovğa çıqarğan ükümini takbih etti. Olar qırımlılarnı azat etmege çağırdı.
«Üç qırımtatarına 48 yıl apis cezası qararı qabul etilmemeli. Rusiyede qanunsız şekilde tutulğan ve apiske alınğan bütün ukrainalılar azat etilmeli», – dep yazdı İsveçinıñ Ukraina elçisi Tobias Thyberg Twitterde.
Sentencing of 3 Crimean tatars to a total of 48 years’ imprisonment in Russia is unacceptable. All Ukrainians illegally detained & imprisoned by RU must be released. https://t.co/vEfBWmCh0s
— Tobias Thyberg (@TobiasThyberg) January 12, 2021
Avropa Birliginiñ Ukraina elçisi Matti Maasikas üç qırımtatarına çıqarılğan ükümge şaştı, dep bildirdi.
«Qanunsız tutulğan ve apiske alınğan ukrainalılar acele azat etilmeli», – dep yazdı elçi Twitterde.
Am appalled by the latest sentencing of 3 Crimean Tatars for a total of 48 years and stand in solidarity with Ayder Dzhapparov, Enver and Riza Omerov. All illegally imprisoned and detained Ukrainians must be released without delay. https://t.co/aFnxIAfTGy
— Matti Maasikas (@MattiMaasikas) January 12, 2021
Yanvarniñ 12-nde Rusiye mahkemesi Qarasuvbazardaki «Hizb ut-Tahrir davası» mabüslerini sert rejim koloniyasında qalmalarına üküm etti. Enver Ömerov 18 yılğa, Ayder Cepparov 17 yılğa, Riza Ömerov 13 yılğa üküm etildi. Mahkümler qabaatlarını tanımay.
Ukraina ombudsmeni Lüdmila Denisova qırımlılarğa çıqarılğan ükümni takbih etti, Ukraina Tış işler nazirligi ise Rusiyeden mahkeme qararını lâğu etmesini ve qırımtatarlarnı azat etmesini talap etti. Rusiye tarafı Ukraina nazirliginiñ beyanatına daa cevap bermedi. Qırım Muhtar Cumhuriyeti ve Aqyar prokuraturası Rusiye mahkemesiniñ ükmüni «daa bir repressiya dalğası» dep adlandırdı.
Bundan bir kün ögüne onlarnen qırımtatar faali Qarasuvbazardaki «Hizb ut-Tahrir davası» mabüslerine üküm çıqarılacaq mahkeme oturışuvına Qırımdan Rostov-na-Donuğa yol aldı. Amma yanvarniñ 11-nde aqşam Keriç köpründe Rusiye politsiyasınıñ hadimleri vesiqalar teşkerilecek manaçığınen qırımtatarlarnı gece boyunca tuttı. Saba episi Qırımğa qaytmağa mecbur edi. Daa soñra Qırım Muhtar Cumhuriyetiniñ prokuraturası qırımtatarlarnıñ Keriç köpründen keçmesi blok etilgeninden tahqiqat başlattı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.