Avropa Birligi cumaaqşamı künü, iyünniñ 27-nde, Rusiyege qarşı iqtisadiy sanktsiyalarnıñ 2020 senesi yanvarniñ 31-ne qadar uzatılğanını resmiy şekilde ilân etti. Bu qararnı Avropa Birligi Şurası qabul etti, dep bildirile resmiy saytta, dep haber ete Azatlıq Radiosı.
Avropa Birligi Şurasınıñ matbuat hızmeti bildirgenine köre, sanktsiyalar Almaniya kantsleri Angela Merkel ve Frenkistan prezidenti Emmanuel Makron devlet yolbaşçıları ve ükümetlerge Minsk añlaşmalarınıñ yerine ketirilgenine dair malümat bergen soñ uzatıldı.
«Bundan soñ Avropa şurası Minsk añlaşmalarınıñ qullanıluvı ve taraflar arasında itibarnı ğayrıdan tiklev maqsadınen muzakere ğayretleriniñ acele ğayrıdan tiklenmesine çağırdı. AB liderleri Rusiyege qarşı iqtisadiy sanktsiyalarnı saqlap qalmağa razı oldı», – dep haber ete Avropa Birliginiñ resmiy saytı.
Avropa Birliginiñ aza memleketleri liderleri iyünniñ 20-nde Ukrainağa qarşı istilâ sebebinden Rusiyege qarşı sektoral iqtisadiy sanktsiyalarnı daa yarım yılğa uzatmağa qarar aldı.
Sektoral iqtisadiy sanktsiyalar Rusiye bankları ve şirketleriniñ Avropa Birligindeki sermiyanıñ birinci ve ekinci bazarları ile bağlarını sıñırlamaqta, silâ satışında ihrac ve italni yasaqlamaqta, arbiy qullanuv ya da Rusiyede arbiy alıcılar içün ekili qullanuv mallarınıñ ihracını yasaqlamaqta, em de cermaynı qazıp çıqaruv ve qıdıruvda qullanıla bilgen tehnologiya ve hızmetlerde Rusiyeni sıñırlamaqta.
İlk sefer bu sanktsiyalar 2014 senesi iyülniñ 31-nde Rusiyeniñ Ukrainadaki vaziyetni kerginleştirüv areketlerine qarşı cevap olaraq kirsetilgen ve 2014 senesi sentâbr ayında quvetleştirilgen edi.