Avropa komissiyası Rusiyege qarşı Moskvanıñ neft ihracatından qazanğan kelirini daa da qısqartmaq maqsadınen 23-ünci sanksiyalar paketini azırlamağa başladı. Politico malümatına köre, yañı sıñırlav leyhası 2026 senesiniñ soñuna qadar AB memleketleri tarafından muzakere etilecek. Bu aqta neşirge Ukrayina memurlarından biri bildirdi.
Orta küzniñ 15-nde sammitte Avropa Birligi memleketleriniñ liderleri Rusiyege qarşı sanktsiyalar basqısını quvetleştirmege çağıracaqlar. Politico tarafından ögrenilgen soñki beyanat leyhasına köre, körüşüv iştirakçileri, ilk evelâ Moskvanıñ neft kelirlerine nisbeten qoşma sıñırlavlar tayin etilmesini talap etecekler.
Bu planlar ABD prezidenti Donald Trampnıñ Rusiye dizel yaqıtına sıñırlavlarnı yımşatmaq qararına zıt kele. Orta küzniñ 9-nda Tramp, Rusiye prezidenti Vladimir Putinnen rus dizelniñ Amerika ve dünya bazarlarına ketirilmesi aqqında añlaşqanını ilân etti. Tahminlerge köre, yaqın aylarda bazarğa beş million tonnağa yaqın qoşma yaqarlıq kelecek.
Politico malümatına köre, Avropa diplomatları Trampnıñ qararını ABD-de İran ile cenk ve Boş ayda keçirilecek Kongress saylavları sebebinden yaqarlıq fiyatlarınıñ artmasınen bağlaylar. Neşirniñ subetdeşleri, qoşma teminlev fiyatlarnı bayağı tüşüreceginden şübeleneler: olarnıñ tahminlerine köre, beyan etilgen miqdar, Amerika talabınıñ tahminen on kününe teñ kele.
Poloniya baş naziri Donald Tusk bildirdi ki, Rusiye cenkni toqtatmağa istemey, şunıñ içün o, AB ortaqlarını cezalarnı quvetleştirmege çağıracaq. Almaniya kansleri Friedrich Merz de yañı sıñırlavlar aqqında ayttı, o, Rusiyeniñ Ukrayina energetik infrastrukturasına ücüm etkenini qayd etti.
Bundan ğayrı, Avropa Birligi Ukrayinağa qarşı cenkte iştirak etken rusiyeliler içün turistik Şengen vizası ile kiriş yasağı üzerinde çalışmağa devam ete. Kelecekte rusiyeli abituriyentlerden arbiy hızmet aqqında vesiqalarnı talap ete bileler. Bu nasıl kerçekleştirilecek daa belli degil.
Ayrı teklifler AB-deki Rusiye diplomatlarına ait. Birleşken memleketler arasında seyaat etmek içün olar evelden bildirüv yerine izin almağa mecbur olalar. Olarnı qabul etken devletlerde bulunma müddetiniñ sıñırlanması da muzakere etile. Bu teşebbüsler boyunca soñki qararlar daa alınmadı.