Avropa Birligi Qara ve Azaq deñizleri regionlarında askerlerniñ sayısı artmasınen beraber Rusiye tarafından küç qullanılması sebebinden qasevetlene, dep bildirdi AB tış siyaset ve telükesizlik siyaseti vekili Federika Mogerini.
«Avropa Birligi Rusiye tarafından Ukraina gemileri ve deñizcileriniñ tevqif etilmesi, em de ateş açılması ve bir qaç Ukraina askeriniñ yaralanmasınen yekünlengen Azaq deñizinde ve Keriç boğazındaki vaziyetniñ kerginleşmesinden qasevetlene», – dep bildirdi Mogerini. O, Avropa Birligi, Rusiyeden halqara uquq talap etkeni kibi Azaq deñizi tarafına Keriç boğazından serbest maniasız areket kefil etmesini bekley, dep qayd etti.
Onıñ qayd etkenine köre, Avropa Birligi meseleniñ tez vaqıtta al etilmesi içün er kesni ağır-sabırlı olmağa çağıra.
«Avropa Birligi Rusiyeni zapt etilgen gemilerni, olarnıñ ekipajlarını ve donatmalarını şartsız ve acele azat etmesine çağıra», – dep ayta Avropa diplomatiyasınıñ yolbaşçısı. Onıñ qayd etkenine köre, Avropa Birligi «Rusiyeniñ 2014 senesi Qırım yarımadasını işğal etip, halqara uquqnı bozğanını» sert bir şekilde takbih ete.
«Keriç köprüsiniñ qurucılığı Ukraina mustaqilligini ve topraq bütünligini kene bozdı», – dedi Mogerini. O, «Ukrainanıñ devlet sıñırlarına, topraq bütünligine halqara seviyede tanılğan sıñırlarda tolusınen qoltutqanını» qayd etti.
Kreml kontrolindeki Kiyev rayon mahkemesi çarşenbe künü, noyabrniñ 28-nde, Keriç boğazında tutılğan Ukraina deñizcileri ve Ukraina telükesizlik hızmetiniñ hadimlerini tevqif etti. Aqmescitteki Rusiye mahkemesi tarafından apiske alınğan Ukraina askerleri 6 yılğa azatlıqtan marum qala bile.
Ukraina Arbiy deñiz quvetleri bildirgenine köre, noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Qırımdaki Rusiye FSB idaresi bildirgenine köre, noyabrniñ 25-nde Ukrainağa ait üç arbiy gemi «Rusiyeniñ devlet sıñırından qanunsız» keçip, Keriç boğazı yolunda «telükeli areketler» yaptı.
Daa soñra belli oldı ki, FSB Qara deñizde Ukraina gemilerine qarşı silâ qullandı. Kyivniñ malümatına köre, FSB açqan ateş neticesinde altı Ukraina askeri yaralandı. Rusiye FSBsi Ukraina gemilerine qarşı silâ qullanılğanını tasdıqlap, yaralanğan üç Ukraina deñizcisi aqqında haber etti.
Ukraina telükesizlik hızmeti bildirdi ki, gemilerde Ukraina deñizcilerinen beraber Ukraina telükesizlik hızmetiniñ eki hadimi bar edi.
Noyabrniñ 26-nda Ukraina Yuqarı Radası Keriç boğazında Rusiye arbiyleri tarafından Ukraina gemilerine açılğan ateş sebebinden bir qaç vilâyette cenk vaziyetini ilân etti.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.