Avropa Birligi Rusiyege qarşı sanktsiyalarnı uzattı, dep haber etile AB Şurasınıñ saytında.
“Şura, Rusiye iqtisadiyatınıñ ayrı saalarına qarşı qoyuğan sanktsiyalarnı 2021 senesi iyülniñ 31-nece uzatmağa qarar aldı. Bu sanktsiyalar 2014-nci yılda Rusiyeniñ Ukrainadaki vaziyetni stabilsizleştirgen arektelerine cevap olaraq qoyuldı”, - yazıla beyanatta.
Böyle qarar, Rusiye Minsk añlaşmalarını tam olaraq yerine ketirmegeni içün alındı.
Keçenlerde, AB elçileri Rusiyege qarşı iqtisadiy sanktsiyalarnıñ uzatılmasını maqul kördi, dep haber etilgen edi.
2014 senesi Qırım işğali ve Donbastaki cenk uruşları başlağan soñ Avropa Birligi Ukraina topraq bütünligi ve mustaqilliginiñ bozuluvınen bağlı sanktsiyalarnı kirsetti.
Sektoral iqtisadiy sanktsiyalar belli Rusiye bankları ve şirketleriniñ Avropa Birligindeki ilkingi ve ekilemci sermiya bazarına kirişlerini sıñırlay, silâ ticaretinde ihrac etüv ve ital etüvni yasaqlay, arbiy qullanuv ya da Rusiyede arbiy alıcılar içün eki yönelişli mal ihracını yasaqlay ve Rusiyeniñ cermay çıqarılmasında ve onıñ qıdırıluvında qullanıla bilgen bazı tehnologiya ve hızmetlerge irişmesini sıñırlay.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.