ATR qırımtatar telekanalı devlet bücetinden para alacaq. Bu aqta Reintegratsiya nazirliginiñ matbuat hızmeti bildirdi.
«2021 senesi iyünniñ 3-nde qırımtatarca ve, kerek olsa, tamır halqlarnıñ auditoriyası içün diger tillerde informatsion mahsulını azırlamaq ve tarqatmaq içün 24 987 000 ğrıvnâlıq satın aluvlar aqqında ilân etildi. Satın aluvlar muzakereler neticesinde yapıldı, çünki tehnik sebeplerden raqiplik yoq. Ukrainanıñ televideniye ve radio yayınları milliy şurasınıñ mektübine köre, Qırım Muhtar Cumhuriyeti ve Aqyar şeerinde qırımtatarca yayın yapqan yekâne kanal ATR kanalı ola. ATR satın aluvlarnıñ ğalibi oldı», – dep aytıla haberde.
Hatırlatamız, fevral ayında Avropa parlamenti Ukrainanı ATR qırımtatar telekanalını paranen temin etmesine çağırdı. Bundan evel Reznikov çetel devletlerine muracaat etip, ATRge maddiy yardım köstermesini rica etti, dep bildirgen edi.
ATR telekanalınıñ reberligi Ukraina Reintegratsiya nazirligini telekanalğa aselet para bermegeninde qabaatlağan edi.
Bundan evel Reintegratsiya nazirligi Ukraina Qırım ve Donbasqa yayın yapqan kanallarğa qol tutmaq içün 50 mln ğrıvnâ sarf etecek, dep bildirgen edi. Ukrainanıñ vaqtınca işğal etilgen topraqlarınıñ reintegratsiya meseleleri nazir muavini İğor Yaremenko nazirlik resurslarnı bir qaç lotqa ayırmağa teklif ete, dedi. Onıñ aytqanına köre, maddiy yardım almaq içün 14 şirket muracaat etti.