Rusiyedeki Cenübiy okrugınıñ arbiy mahkemesi Qırım sakinini «Ateş» Ukrayina tarafdarı areketine qoşulmağa ve, aytılğanına köre, teraktlarğa çağırğanı içün 16 yılğa üküm etti. Bu aqta mahkemeniñ matbuat hızmeti haber etti.
Rusiye tahqiqatınıñ malümatına köre, mabüs 2022 senesi sentâbr ayında Bağçasarayda olıp, teşkilâtqa qoşulmaq çağıruvı yazılğan videonı tapqan ve dostlarına yollağan. Soñra ise aynı şu tanışlarına yarımadada nasıldır bir terakt yapmağa teklif etken eken.
Mahkemeniñ qararına köre, qırımlı 16 yılğa üküm etildi ve 100 biñ ruble para cezası berildi.
Mabüsniñ izaatları yoq. Muarririyet adını ahlâqiy sebeplerden aytmay.
2022 senesi sentâbr ayından başlap Qırımda Rusiye işğal etken Ukrayina topraqlarında ve Rusiyeniñ özünde özüni «ukrayinlerniñ ve qırımtatarlarnıñ arbiy areketi» dep adlandırğan «Ateş» partizan teşkilâtı areket ete.
Ukrayinağa qarşı büyük istilâ başlağan soñ Rusiyede ve işğali altındaki topraqlarda cenkke qarşı çıqqanlar kütleviy sürette taqip etile. 2023 senesi Rusiye Federatsiyasında eñ az 98 kişi satqınlıq, 31 casuslıq, 19-ı ise ecnebiylernen işbirligi cinaiy davalarınıñ iştirakçisi oldı. Mahkemelerge eñ az 88 dava ketirildi, olardan 50-si endi qabaatlavlarnen neticelendi, dep esapladı Sibir.Realii.
Qırımda 2015 senesi Rusiye mahkemesi rejisser Oleg Sentsovnı teraktnı teşkil etüv qabaatlavınen 20 yılğa üküm etti. Rusiye uquq qoruyıcıları «Hizb ut-Tahrir» islâm siyasiy firqasınıñ vekillerini de «diversiyada» qabaatlay.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.