İlaçlarnı Yalkabovnıñ soy-sopları satın alıp, Rusiye Federatsiyasınıñ Ulânov vilâyetindeki 1-nci Dimitrovgrad apishanesine yolladılar. Apishaneniñ tibbiy bölüginde olğan ilâclar oña kelişmey ve bronhiyal astma tutuvlarını toqtatmay.
"İlaсlarnı vaqtında yolladım, amma ekim tatilde edi. Memuriyet oña öz ilâclarını berdi, amma olar oña yardım etmediler", — dep tarif etti qırımlınıñ ömür arqadaşı Aliye Yalkabova.
Siyasiy mabüsniñ nevbetteki tutuluvından soñ apishaneniñ hadimleri soy-soplarınıñ yollağan paketinden bir ingalâtornı alğanlar.
Aliye qoştı ki, ekim sentâbr ayında tatilden çıqtı ve tek o vaqıt oña bütün ilâclarnı berdiler.
Yalkabovnı tüzetüv müessisesinde advokat ziyaret etti. Apishanede bulunğan vaqtında siyasiy mabüsniñ buğumları ve dizleri ağırıp başlağanından şikâyet etken.
2021 senesi fevralniñ 17-nde Qırımda Qarasuvbazar, Bağçasaray, Aqmescit, Aqyar ve İçki rayonında kütleviy tintüvler keçirildi. Lenur Seydametov, Timur Yalkabov, Azamat Eyupov, Yaşar Şihametov, Ernest İbragimov ve Oleg Fedorov evlerinde keçirilgen tahqiqat tedbirlerinden soñ Qırımdaki FSB idaresine ketirildi. Soy-soplarına FSB tahqiqatçıları tutulğanlar Rusiye Ceza kodeksiniñ 205.5 maddesine istinaden qabaatlana. Qırımtatarlar Rusiyede yasaqlanğan, amma Ukrayınada ve bir çoq memlekette milliy qanunlar seviyesinde sıñırsız çalışqan «Hizb ut-Tahrir» teşkilâtı ile alâqaları bar olğanında qabaatlandı.
2022 senesi sentâbrniñ 9-nda Rostov-na-Donu Cenübiy okrugınıñ arbiy mahkemesi Yaşar Şihametovnı terrorizmde qabaatlap, 11 yılğa azatlıqtan marum etti.
Aq qorçalayıcılarnıñ fikirince, teşkilât azalarını ükümet devrimini azırlav ve terrorizm içün degil, firqa tarafdarlarınıñ Qırımda siyasiy repressiyalarğa qarşı cemaat aktsiyaları, Rusiye akimiyetini tenqit etkenleri ve qırımtatarlar 2014 senesi işğalge qarşı çıqqanları içün taqip eteler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.