Ukrayinada Herson şeer mahkemesi Qırımtatar Milliy Meclisiniñ Herson vilâyetindeki regional bölükniñ sabıq reisi, Ukrayina prezidentiniñ Qırım Muhtar Cumhuriyetindeki daimiy temsilcisiniñ sabıq yardımcısı Asan Aliyevni ğıyabiy şekilde 10 yılğa üküm etip, mülkini musadere etmege qarar berdi.
Bu aqta Jurnalist tedqiqatları merkezi mahkeme qararına esaslanıp haber etti.
Berilgen malümatqa köre, 2022 senesi Aliyev Rusiye ordusı ve akimiyetinen açıq işbirligi yapıp, Herson vilâyetiniñ Novoalekseyevka qasabasında işğalci memuriyet yolbaşçısı oldı.
«Mahkeme çıqarğan hulâsağa köre, Aliyev Asan Remziyeviç, Herson vilâyeti Geniçesk rayonınıñ Novoalekseyevka sakini 2022 senesi mayıs ayında qasabanıñ yerli işğalci memuriyetinde öz isteginen yolbaşçılıq etti. Soñra ise Aliyev Rusiye propagandacılarına intervyü berip, işğal etilgen yarımadada sözde «Qırım Cumhuriyeti Devlet şurasında» tögerek masa toplaşuvında iştirak etti, işğalci memuriyet içün hadimlerni işke aldı, bir kerelik 10 biñ ruble ödemeleriniñ emri berdi ve lafta gumanitar yardımnen oğraştı», – dep aytıla haberde.
Onıñ areketleri Ukrayina Ceza kodeksiniñ 111-1 maddesiniñ 5-inci qısmına (İşbirlikçi faaliyet) istinaden tasnif etildi. Jurnalist tedqiqatları merkezi yazğanı kibi, 2023 senesi iyulniñ 14-nde Mıkolayıv Merkeziy rayon mahkemesiniñ qararınen tevqif etilgen 0,1 ga topraq damartısını da musadere etecekler.
2005 senesinden 2014 senesine qadar Aliyev Qırımtatar Milliy Meclisiniñ Herson bölüginde reis oldı, Herson vilâyeti memuriyetiniñ yolbaşçı yardımcısı ve Ukrayina prezidentiniñ Qırım Muhtar Cumhuriyetindeki daimiy temsilcisiniñ yardımcısı edi, anda milletlerara munasebetler meselelerinen oğraşqan edi.
Ukrayına prezidentiniñ Qırım Muhtar Cumhuriyetindeki temsilcisi Tamila Taşeva bildirdi ki, «Qırımnıñ işğalden azat etilmesinden soñ Ukrayınanıñ esas vazifelerinden biri - yarımadanıñ Rusiye tarafından ilhaqına yardım etkenlerni tapmaq ve mesüliyetke çekmek olacaq». Onıñ aytqanına köre, insanlıqqa qarşı cinayetlerni ve arbiy cinayetlerni yapqanlar, insan aqlarını bozğanlar ve genotsid kibi tanılğan cinayetlerni yapqanlar mesüliyetke çekilmeli.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.