Bir kün evelsi kimligi belli olmağan üç kişi tarafından tutulğan «Armançıq» qırımtatar bala mecmuasınıñ muarriri 61 yaşında Ediye Muslimova Aqmescitte Rusiye Federatsiyasınıñ FSB binasında bulunmaqta. Bu aqta Qırımtatar Milliy Meclisiniñ reisi Refat Çubarov Telegram kanalında bildirdi.
Çubarovnıñ tahminlerine köre, Muslimova Rusiye uquq qoruyıcıları tarafından basqığa oğratıla bile.
«Statusını bilmeymiz, amma diger qırımtatarlarnıñ yüzlernen tutuluvına baqılsa, tutulğanından resmiy şübhelenüv tanıtılğanına qadar (aman-aman bir kün keçti) Ediye Muslimovanıñ cezalayıcılar uydurğan qabaatlavlarnı tanıması maqsadınen basqığa oğratılması mümkün», – dep aytıla haberde.
Cuma künü belli olğanına köre, Qırımda «Armançıq» qırımtatar bala mecmuasınıñ baş muarriri 61 yaşında Ediye Muslimova tünevinden berli bağğa çıqmay. Ne şahsiy, ne de iş telefonı çalışmay. Ediye Muslimovanıñ maşinası ev yanında tura. Soy-sopları Rusiye polisine muracaat etti ve onı qıdıra, dep bildirdi ciyeni Elzara Muslimova.
Aq qorçalayıcı Lutfiye Zudiyeva Facebook saifesinde Ediye Muslimova noyabrniñ 21-nde aqşam kimligi belli olmağan üç erkek tarafından tutuldı. Onı beyaz GAZelge mindirip, belli olmağan yerge alıp ketkenler.
«Armançıq» 2011 senesinden berli Qırımda basıla ve er ay çıqa. 2019 senesi Ediye Muslimova mecmuanıñ vaziyeti zor ve qapatılmaq üzre, dep aytqan edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.