Rusiye kontrolindeki Aqyar yolbaşçısı Mihail Razvojayev Lastova meydanındaki ücümniñ aqibetlerini kösterdi. Munasip videolarnı Telegram kanalında derc etti.
Razvojayevniñ aytqanına köre, Rusiye Merkeziy bankınıñ Cenübiy idaresiniñ binasına raketa tüşti, amma amma qaysı tür raketanolğanını aytmadı. Fotolarda bozulğan cam ve dam körüne. Bundan da ğayrı, o, Lastova meydanında zarar körgen ev aqqında bildirdi. Videoda zarar körgen pencereler ve fasadlarnı körmek mümkün.
Bundan ğayrı, Razvojayev Gogol soqağında eki zararlanğan kişi aqqında bildirdi.
"Gogolde olğan vaziyetke dair: yazıq ki, eki zararlanğan kişi bar: olar esli-başlı bir erkek ve bir qadın. Qadınnıñ közü yaralandı, aqayda qırıq ve qapalı qafa-miy yarası bar", — dep yazdı Razvojayev.
O, ücümniñ aqibetlerinden videonı köstermedi. Onıñ aytqan malümatınıñ tasdıqlanması kerek.
2022 senesinden berli Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.