Rusiyeniñ Mariy El Cumhuriyetindeki koloniyada bulunğan Aqyardaki «Hizb ut-Tahrir davasınıñ» mabüsi Nuri Primov muntazam sürette ceza izolâtorına qapatıla. Bu aqta «Qırım birdemligi» cemaat birleşmesi anası Raime Primovanıñ aytqanına esaslanıp bildire.
«Oğlum Primov Nuri 2 aydan çıqacaq, amma onı ne içündir er vaqıt ceza izolâtorına qapatalar: keçken ayda 10 kün oturdı, bundan eki kün ögüne evden yollanma kelgen edi, anda onı almağa bermediler. Neticede bir çoq erzaq bozuldı, olarnı atmağa mecbur oldı; şimdi (bizden) kene yollav keldi, onı 25-nde almalı, amma ne içündir bağlanıp olamayıq», – dedi Raime Primova.
Koloniyanıñ vekilleri Nuri Primovnıñ anası bergen malümatnı izaatlamadı. Mariy El Cumhuriyetindeki Cezalarnı yerine ketirüv federal hızmetiniñ idaresi de bir şey aytmay.
2017 senesi sentâbr ayında Rostov-na-Donudaki Şimaliy-Kavkaz okrugınıñ arbiy mahkemesi qararını seslendirip, «Hizb ut-Tahrir davasınıñ» aqyarlı mabüsleri Ferat Sayfullayev, Rustem Vaitov ve Nuri Primovnı beş yıl umumiy rejim koloniyasında qalmalarına üküm etti.
2018 senesi iyünniñ 20-nde Qırımda 68 yaşında Raime Primova açlıq ilân etti. O, Rusiye mahküm etken oğlunı almaştıruv cedveline kirsetmege talap etti. Narazılıq vaqtında onı hastahanege alıp ketkenler. Daa soñra Raime Primova açlığını toqtattı.
Keçken sene dekabr ayında Rusiyeniñ Mariy El cumhuriyetiniñ Sovet rayon mahkemesiniñ qadısı Yelena Yakimova Nuri Primovnı şartlı olaraq vaqtından evel azat etmege razı olmadı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.